ኦብነግ ሰለስተ አባላቱ ብመጥቓዕቲ ተኹሲ ከምዝሞቱ ኣፍሊጡ

ኣብ ከተማ ቀሪደሃር ክልል ሶማሌ ትማሊ ሰሉስ 20 ሰነ 2023 ሓደ ኣባል ሰራዊት ምክልኻል ብዝኸፈቶ ሃንደበታዊ ተኹሲ ኣርባዕተ ሰባት ምሟቶምን ካልኦት ሰለስተ ድማ ምቑሳሎምን ግንባር ሃገራዊ ናፅነት ኦጋዴን (ኦብነግ) ኣፍሊጡ።

እቶም ዝተቐትሉ ሰለስተ ሰባት “ኣባላተይ እዩም” ዝበለ ኦብነግ ፌደራል መንግስቲን እቲ ክልልን ነቲ ተግባር ኣፃርዮም ቅልጡፍ ስጉምቲ ክወስዱ ሓቲቱ።

ኣብ ዝሓለፉ ሽዱሽተ ኣዋርሕ ናብቲ ክልል ብዝተመልሱ ገለ ኣባላት ሰራዊት ምክልኻል ዝተፈላለዩ መጥቃዕትታት ይፍፀሙ ምህላዎም ዝገለፀ እቲ ግንባር መዓስከራት ሰራዊት ካብ ከተማታት ክርሕቁን ሓይልታት ምክልኻል ዕጥቂ ሒዞም ናብቲ ከተማ ንኸይኣትዉ ክኽልከሉ ወሲኹ ሓቲቱ።

ሓላፊ ቤት ፅሕፈት ርክባት እቲ ክልል ብወገኑ ነቲ ተግባር ዝፈፀመ ወተሃደር ካብቲ መዓስከር ዝሃደመ ምዃኑን ንሰለስተ መዓልታት ክድለ ምፅንሑ ገሊፁ፡ ነቲ ቀዲሙ ተኲሱ ዝወቀዖ'ውን ነባሪ ቀብሪ ደሃርን ኣባል ኣመራርሓ እታ ኸተማ ምዃኑን ኣፍሊጡ።

እቲ መጥቃዕቲ ዝፈፀመ ወትሃደር ተወሳኺ ሓደጋ ቅድሚ ምፍጻሙ ብኣባላት ሰራዊት ምክልኻል ስጉምቲ ከምዝተወሰዶ ነበርቲ እታ ኸተማ ገሊጾም።