ዳይረክተር ፍሉይ ኣሃዱ ሓለዋ ኣመሪካ ካብ መዝነታ ወሪዳ

ድሕሪ ፈተነ ቅትለት ትራምፕ ካብ በበይኑ ወገናት፡ ካብ መዝነታ ክትለቅቕ ተደጋጋሚ ጸቕጢ ከጋጥማ ዝጸንሐት ዳይረክተር ፍሉይ ኣሃዱ ሓለዋ ኣመሪካ (Secret Service) ዝዀነት ኪምበርሊ ቺትል ሎሚ ሰሉስ ካብ መዝነታ ለቒቓ። ነቲ ፍሉይ ኣሃዱ ካብ ነሓሰ 2022 ኣትሒዛ ክትመርሖ ዝጸንሐት ቺትል፡ “ኣብ እዋን ፈተነ-ቅትለት ትራምፕ ዝተራእየ ዝኸፍአ ስሕተትን ምሉእ ሓላፍነት ድማ ዝስከመሉን’የ፡” ኢላ ብኢመይል ኣብ ዝለኣኸቶ መልእኽቲ ኣፍሊጣ'ላ።

ኣብ ፐንሲልቫንያ ኣብ እዋን ጎስጓስ ወፍሪ ምርጫ ትራምፕ፡ ወዲ 20 ዓመት ተኳሲ ቶማስ ማቲው ክሩክስ ካብቲ ትራምፕ 134 ሜትሮ ጥራይ ርሒቑ ክትኵስ ምኽኣሉ ኣብ ሓለዋ ዝነበረ ጉድለት ምዃኑ ሓያሎ ክዛረቡ ቀንዮም’ዮም።

ነቲ ብ13 ሓምለ ኣብ ልዕሊ ፕረዚደንታዊ ተወዳዳሪ ዶናልድ ትራምፕ ንምቕታል ዝተገብረ ፈተነን ተበግሶን ድፍኢት ኣብ ምጽራይ ዘሎ ኰይኑ፡ ብዛዕባኡ ግን ዛጊት ወግዓዊ ዝዀነ ሓበሬታ የሎን።