ሩሲያ ኣብ ልዕሊ ዩክሬን ደብዳብ ነፈርቲ ፈፂማ

ሩሲያ ኣብ ልዕሊ ዩክሬን ትማሊ ሰንበት ሓያል ደብዳብ ነፈርቲ ከም ዝፈፀመት ተፈሊጡ። ከባቢያዊ ሰበስልጣን ከም ዝሓበሩዎ በቲ መጥቓዕቲ ሓያሎ ሰባት ከም ዝተቐተሉን ኣብ ስርዓተ ጸዓት ናይታ ሃገር ከቢድ ዕንወት ከም ዝወረደን ሓቢሮም ኣለው።

እቲ ዝኸበደ ኣብ ዝተባህለ ደብዳብ ነፈርቲ ምክልኻል ኣየር ዩክሬን ንገለ ኣብ ሰማያት ዋና ከተማ ኪቭ ኣፍሺሉዎም ኣሎ። ተደጋጋሚ ደወል ሓደጋ ከም ዝተሰምዐን ሰባት ካብቲ ሓደጋ ንምምላጥ ናብ ትሕቲ መሬት ዘለው ናይ ባቡር ጣቢያታት ይሃድሙ ከም ዝነበሩን ተገሊፁ ኣሎ።

ፕረዚደንት ዩክሬን ቮሎድሚር ዘለንስኪ ሩሲያ 120 ሚሳይላት ዝርከብኦም 90 ድሮናትን ከምዝተጠቐመት ሓቢሮም። ሓይሊ ኣየር ዩክሬን ን104 ሚሳይላትን ን42 ድሮናትን ከም ዘዕነወ እቶም ፕረዚደንት ገሊፆም ኣለው።