ኣብ ልዕሊ ጸሊም ባሕሪ ዝበራ ድሮናት ኣመሪካ ቀጥታዊ ረጽሚ ከጋጥመን ይኽእል `ዩ ክትብል ሩስያ ኣጠንቂቓ

ኣብ ልዕሊ ጸሊም ባሕሪ ዝበራ ድሮናት ኣመሪካ ቀጥታዊ ረጽሚ ከጋጥመን ይኽእል `ዩ ክትብል ሩስያ ናብ ኣመሪካ መጠንቀቕታ ኣመሓላሊፋ። ነቲ ብዩክሬን ኣብ ልዕሊ ክረሚያ ዝተፈጸመ መጥቃዕቲ`ውን፡ ክረምሊን ንዋሺንግተን ተሓታቲት ጌራ`ላ።

ዝሓለፈ ሰንበት ኣብ ልዕሊ`ታ ሩስያ ዝጸንበረታ ክረሚያ ዝተፈጸመ ናይ ሚሳይል መጥቃዕቲ ኣርባዕተ ሰባት ዝቐተለ ክኸውን ከሎ፡ ነዚ ድማ ሩስያ: ዩክሬን ናይ ኣመሪካ ሚሳይል እያ ተጠቒማ ዝብል ክሲ ተቕርብ ኣላ ።

ብፍላይ`ቲ ኣብ ልዕሊ ጸሊም ባሕሪ ዝግበር ናይ ስለያ በራራታት ኣብ መንጎ ሩስያን ኔቶን ቀጥታዊ ረጽሚ ከስዕብ ይኽእል`ዩ ክትብል ሩስያ ኣጠንቂቓ `ላ። ሚንስትሪ ምክልኻል ኣመሪካ ብዛዕባ መጥቃዕቲ ክረሚያ ኣብ ዝሃቦ ምላሽ ዩክሬን ትገብሮ መጥቃዕቲ ባዕላ ትውስኖ`ዩ ክብል ከሎ ሚንስትሪ ጉዳያት ወጻኢ ኣመሪካ ድማ ክረሚያ ኣህጉራዊ ኣፍልጦኣ ኣካል ዩክሬን ምዃና `ዩ ዝብል ምላሽ ሂቡ`ሎ።