ፕረዝደንት ፑቲን ምስ ቀዳማይ ሚኒስትር ጣልያን ፓውሎ ጀነቲሊኒ ኣብ ዝተራኸብሉ እዋን፡ ሚኒስትር ላቭሮቭ ትርጉም ዘለዎ ምስጢር ከምዘየሕለፉሎም ነቲ ምስ ፕረዝደንት ትራምፕ ዝተካየደ ርኽብ ዝሰነደ መረዳእታ’ውን ከቕርቡ ድልው ምኳኖም ገሊጾም።
ፕረዝደንት ትራምፕ ብወገኖም ነቲ ብመራኸቢ ብዙሃን ዝቐረበሎም ተኣፋፊ ሓበሬታ ንሚኒስትር ላቭሮፍን ኣምባሳደር ሰርጌር ኪስልያክ ኣመሓላሊፎም’ዮም ዝብል ክሲ ምንጻጎም ይፍለጥ።
እንተኾነ ፕረዝደንት ትራምፕ ምስቶም ላዕለዎት ዲፕሎማት ሩስያ ሓበሬታ ናይ ምልውዋጥ መሰል ከምዘለዎም ብምግላጽ ሩስያ ኣብ ቃልሲ ኣንጻር ግብረ ሽበራን ዳዒሽን ተሳትፎአ ከተሐይል ኣብ ዝብል ምዝርራቦም ኣብ ናይ ቲዊተር መልእኽቶም ገሊጾም።
ፕረዝደንት ትራምፕ ኮነ ላዕለዎት ሓለፍቲ ንምእኻብ ሓበሬታ ኮነ ንምንጭታት ኣብ ሓደጋ ዘእትው ዝኾነ ተአፋፊ ሓበሬታ ንሚኒስትር ላቭሮቭ ከምዘይተመሓላለፈ`ዮም ዝገልጹ።
ኣማኻሪ ሃገራዊ ጸጥታ ኣሜሪካ ኤች ኣር ማክስተር ዘተ ፕረዝደንት ትራምፕ ምስ ሚኒስትር ላቭሮቭ “ምሉእ ምሉእ ብቑዕ” እዩ ክብሉ ገሊጾም።
ንሶም ብተወሳኺ “ምንም ዘሻቕል ኣይኮነን” ክብሉ ቃሎም ሂቦም ኣለው።
እዚ ከምዚ ኢሉ ከሎ ዝለሓኾ ሓበሬታ ንገዛእ ርእሱ እስላማዊ መንግስቲ ኢሉ ዝጽውዕ ጉጅለ ግብረ ሽበራ ኣብ ላፕቶፕ ኮምፒተር ነታጉ ብምሕባእ ከካይዶ ዝሓሰበ መጥቓዕቲ ብዝምልከት ዝሓወሰ ምኻኑ ይግለጽ ኣሎ።
ፕረዝደንት ፑቲን ብተወሳኺ እቲ ኣብ ኣሜሪካ ዘሎ ስምዒት ኣንጻር ሩስያ ነታ ሃገር የዕንው ምህላውን ፕረዝደንት ትራምፕ ብግቡእ ከየመሓድሩ ይዕንቕፍ ከምዘሎን ድሕሪ ምግላጽ ንነቐፍቲ ምምሕዳር ትራምፕ ካብ ናይ ፖለቲካ ከውንነት ዝረሓቑ’ዮም ክብሉ ወቂሶም ኣለው።
