ምድላዋት ንበዓል ትንሳኤ፡ ዕዳጋታት ይንህር

ኣመንቲ ክርስትና ኢትዮጵያን ኤርትራን ንበዓል ትንሳኤ ይዳለዉሉ ኣብ ዘለዉሉ እዋን፡ ዋጋታት ጤለ-በጊዕን ከብቲን፡ ከምኡ’ውን ካልእ ንበዓላት ዘድሊ ጥረ-ነገራት ኣመና ምውሳኹ ወኪላት ድምጺ ኣመሪካ ካብቲ ቦታ ልኢኾም። ዕዳጋታት፡ በቲ ኣብቲ ከባቢ ብቐንዱ ድማ ንሓያሎ ሃገራት ዓለም ዝጸለወ ምዝሓታል ቍጠባ፣ ምስ ወራር ዩክሬን ተኣሳሲሩ ዝመጽአ ምብታኽ ቀረባትን ኣብ ገለ ወገናት ኢትዮጵያ ዝተራእየ ደርቂን ምዃኑ እቲ ጸብጻባት ይሕብር።

ኣብ ዕዳጋታት መቐለን ዓዲግራትን ተዘዋዊሮም ዝተዓዘቡ ልኡኻት ድምጺ ኣመሪካ፡ መጠን ዋጋታት ጤለ-በጊዕን ከብቲን ካብ ናይ ዝሓለፈ በዓል ብዕጽፊ ምውሳኹ ሓቢሮም። ኣብ መቐለ ዋጋ ዓቢ በጊዕ ክሳብ 15-ሽሕ ብር ክበጽሕ እንከሎ፡ ብዕራይ ድማ ክሳብ 130-ሽሕ ብር ይሽየጥ ምህላዉ ኣብቲ ናይ ዕዳጋ ዝተረኽበ ወኪልና ልኢኹ።