ፕረ.ኮንጎ ዓቀብቲ ሰላም ሕ/ሃገራት ካብ ሃገሩ ክወጹ ጸዊዑ

ዓቀብቲ ሰላም ሕቡራት ሃገራት ካብ ሃገሩ ክወጹ ፕረዚደንት ኮንጎ ፍለክስ ትሺከዲ ንባይቶ ሕቡራት ሃገራት ጸዊዑ።

ትማሊ ረቡዕ ኣብ ኒው-ዮርክ ንሓፈሻዊ ዋዕላ ሕቡራት ሃገራት መደረ ዘስምዐ ፕረዚደንት ትሺሰከዲ፡ ሃገሩ እቶም ዓቀብቲ ሰላም ክሳብ መወዳእታ`ዚ ዓመት ጠቕሊሎም ከም ዝወጹ ከተረጋግጽ ትደሊ`ያ ኢሉ።

እቲ ምውጻእ ዓቃቢ ሰላም ሕቡራት ሃገራት ክሳብ ዝመጽእ ዓመት ክፍጸም ተዘትይሉ እንተነበረ`ኳ፡ ሕጂ ግን ክቀላጠፍን ክሳብ መወዳእታ ወርሒ ታሕሳስ ናይ`ዚ ዓመተ 2023 ክፍጸም መምርሒ ሂቡ ከም ዘሎን ፕረዚደንት ደሞክራቲክ ሪፓብሊክ ኮንጎ ሓቢሩ'ሎ።

እቲ ብ `ሞኑስኮ` ዝብል ምሕጻረ ቃል ዝፍለጥ ተልእኮ ዓቃቢ ሰላም፡ ኣብ ምብራቓዊ ኮንጎ ንዝነበረ ስእነት ጸጥታ ንምርግጋእ ተባሂሉ ኣብ 2010 ናብታ ሃገር ዝኣተወ እንተኾነ ካብ ሒደት ዓመታት ጀሚሩ ፡ ካብ ህዝቢ ድጋፍ እናተፍጎ`ዩ ክመጽእ ጸኒሑ። ዝሓለፈ ወርሒ`ኳ ኣንጻር`ቶም ዓቀብቲ ሰላም ኣብ ዝተገብረ ኣድማ ብዙሓት ሰባት ተቐቲሎም`ዮም።