ቀዳማይ ሚኒስተር ጃፓን ኣብ ኣመሪካ  ናይ ስራሕ ምብጻሕ ይፍጽም

ቀዳማይ ሚኒስተር ጃፓን ፉሚዮ ኪሺዳ ኣብቲ ነዊሕ ትጽቢት ዝተገብረሉ ጉዕዞ ሎሚ ሰሉስ ኣመሪካ ኣትዩ፡ ምስ ላዕለዎት ሰብ-መዚ እታ ሃገር ይዘራረብ ኣሎ። ምስ በዓልቤቱ ኣማስያኡ ናብ ቤተ መንግስቲ ዋይት-ሃውስ ሓጺር ምብጻሕ ክገብር መደብ ተታሒዙሉ ዘሎ ቀዳማይ ሚኒስተር ከሺዳ፡ ጽባሕ ረቡዕ ኣብቲ ንኽብሩ ብፕረዚደንት ጆ ባይደን ዝዳሎ ዓቢ ናይ ድራር እንግዶት ክሳተፍ መደብ ተታሒዙ ኣሎ።

ቀዳማይ ሚኒስተር ኪሺዳ ፕረዚደንት ባይደን ስልጣን ካብ ዝሕዝ ንነጀው ሃገራዊ እንግዶት ዝግበረሉ ሓሙሻይ መራሒ ሃገር ክኸውን’ዩ።

ምብጻሕ መራሒ ጃፓን ኣብ መንጎ ቻይናን ጃፓንን ዘሎ ወጥሪ ኣብ ዝንህረሉ እዋን’ዩ ዝፍጸም ዘሎ። ነታ ኣብ ጃፓን 54-ሽሕ ሰራዊት ዘለዋ ኣመሪካ ድማ መራሕቲ ክልቲኣን ሃገራት ኣብ ናይ ምክልኻልን ካልእ ቍጠባዊ ሽርክነትን ኣመልኪቶም ክዘራረቡ ትጽቢት ይግበር።