ቀ/ሚ ብሪጣንያ ንዳግመ ምትዕርራይ ሕጊ ሕብረት ኣውሮጳ ይጽውዕ

ህዝቢ ዓባይ ብሪጣንያ ምስ 28 ዝአባላቱ ህብረት ኣውሮጳ ንጽናሕ'ዶ ኣይፋልናን አብ ዝብል ረፈረንደም ቅድሚ ምስታፉ ንዳግመ ምቋም እቲ ሕብረት ተኸታተልቲ ስጉምትታ ክወስድ ቀ/ሚ ዴቭድ ካሜሮን ጸዊዖም።

ሓደ ካብቶም ጠለባት መሰል'ተን ዮሮ ዘይጥቀማ ሓደ ሲሶ አባል ሃገራት ምሕላው ዝብል'ዩ። ሕብረት አውሮጳ ሓደ ባጤራ'ዩ ዝጥቀም እንተተባሂሉ ግና ብሪጣንያ ኣይምልከታን'ዩ ኢሎም ቀ/ሚ ካሜሮን።

ወሃቢት ቃል ሕብረት አውሮጳ ማርጋሪታ ሽናስ ግና 'ሚስተር ካሜሮን ዘቃልሕዎም ጠለባት ንመሰረታዊ ነጻነትን መትከላትን ውሽጣዎ ዕዳጋ ዘናውጽ ስለዝኾነ ንምትግባሩ አጸጋሚ'ዩ ኢላ።

ቀ/ሚ ካሜሮን ግና አብ ብሪጣንያ ድሕሪ ክልተ ዓመት ረፈረንደም ክካየድ ከምዝኽእልን ህዝቢ ይትረፈና እንተይሉ እቲ ውሳነ ናይ መወዳእታ አሳሪን ክኾን'ዩ ካልኣይ መዓልቲ ልዝብ ወይ ረፈረንደም ዝባሃል ነገር ኣይልዓልን'ኢሎም።