ሰበ ስልጣን ፊሊፒንስ ምስ አደንዛዚ ዕጺ ብዝተሓሓዝ 25 ሰባት ምቅታሎም ተገሊጹ

ሰበ ስልጣን ፊሊፒንስ ኣብ ዋና ከተማ ማኒላ ምስ አደንዛዚ ዕጺ ብዝተሓሓዝ 25 ሰባት ምቅታሎም ተገሊጹ።

እዚ ቅትለት አካል እቲ ፕረዝደንት ሮድሪጎ ዱርተ ንጥርጡራት አደንዛዚ ዕጺ ንምጥፋእ ዝሃብዎ ትእዛዝ ምኳኑ ተፈሊጡ’ሎ።እዚ ቅትለት አቐዲሙ ፖሊስ እታ ሃገር ኣብ ከባቢ ዋና ከተማ ማኒላ ዝርኸቡ አውራጃታት ልዕሊ 30 ሰባት ብተመሳሳሊ ድሕሪ ምቕታሎም ዝተፈጸመ ምኳኑ'ውን ተገሊጹ አሎ።

ዝሓለፈ ዓመት ኣብታ ሃገር ዝተኻየደ ምርጫ ብቀሊሉ ዝተዓወቱ ፕረዝደንት ዱርተ እታ ሃገር ካብ ወልፊ አደንዛዚ ዕጺ ነጻ ንምግባር በኣሰርተታት አሽሓት ዝቑጸሩ አደንዛዚ ዕጺ ዘሰጋገሩን ወልፊ ዘለዎም ሰባት ከምዝቐትሉ ቃል ምእታዎም ይፍለጥ።

ይኹን ደአ እምበር ጉጅለታት ተሓለቕቲ ሰብኣዊ መሰላት እዚ ቅትለታት ገበን አንጻር ሰብኣዊነት ክቑጸር ከምዝኽእል ይመኽሩ።