ሰራዊት ቅልጡፍ ወሃብ ድጋፍ ሱዳን ንኸተማ ኒያላ ምቍጽጻሩ ሓቢሩ

ሽዱሽተ ኣዋርሕ ኣብ ዘቝጸረ ኲናት ሓድሕድ ሱዳን፡ መራሕቲ ላዕለዎት ኣዘዝቲ ኣብ ጅዳ ንምዝርራብ ኣብ ዝቀራረብሉ ኣብ ዘለውሉ ሕጂ እዋን፡ ሰራዊት ቅልጡፍ ወሃብ ድጋፍ ንኸተማ ኒያላ ምቍጽጻሩ ኣፍሊጡ። ምቍጽጻር ንርእሰ-ከተማ ደቡብ ዳርፎር ዝዀነት ኒያላ፡ ሰራዊት ቅልጡፍ ውሃብ ድጋፍ ብዓቢ ይጽንብሎ ምህላዉ ዝገለጸ ዜና ሮይተርስ ብዛዕባኡ ካብ ኣንጻር ወገን ግብረ-መልሲ ንምርካብ ዝገበሮ ፈተነ ኣይተዓወተን።

ብጀነራል ዓብዱልፈታሕ ኣልቡርሃን ዝምራሕ ሰራዊት፡ ንዝበዝሕ ወገናት ካርቱም’ውን ካብ ቍጽጽሩ ወጻኢ ስለ ዘሎ፡ ከም ቀንዲ መዋፈሪኡ ናብ ፖርት-ሱዳን ይግዕዝ ከም ዘሎ ሮይተርስ ጠቒሱ።

ከተማ ኒያላ ኣብቲ ዞባ ስትራቴጂካዊ ኣገዳስነት ስለ ዘለዋ፡ ኣብ ዙርያኣ ነዊሕ ዝወሰደ ኲናት’ዩ ጸኒሑ። ከም ሳዕቤኑ ድማ ኣስታት 670-ሽሕ ዝበጽሑ ዜጋታት ደቡብ ዳርፎር መንበሪታቶም ገዲፎም ምህዳሞም ሮይተርስ ጠቒሱ።

ካልኦት ከተማታት ዳርፎር ንምቍጽጻርን ምዕቃብን ኣብ በበይኑ ወገናት ኲናት ይቕጽል ምህላዉ ተፈሊጡ ኣሎ።