ኣብ ጉዳይ ኣመራርሓ ፈደራሊስ ኮንግረስ ኦሮሞ ምስክርነት ክህቡ ዝተጸውዑ ሰበ ስልጣን መንግስቲ ተለዋጢ ቆጸራ ክወሃቦም ሓቲቶም

ኣቶ በቀለ ገርባ ዝርከቡዎም ኣባላት ኣመራርሓ ፌደራሊስት ኮንግረስ ኦሮሞ ብዝተኸሰስሉ ጉዳይ ንምስክርነት ዝተፀውዑ ሓሙሽተ ላዕለዎት ሰበስልጣን መንግስቲ ምቕራብ ብዝምልከት ውሳነ ንምሃብ ቤት ፍርዲ ተለዋጢ ቆፀራ ምሃቡ ተፈሊጡ።

ንመከላኸሊ ምስክርነት ዝተፀውዑ ናይ ኦሮሚያ ክልላዊ መንግስት ፕረዚደንት ኣቶ ለማ መገርሳ ሓዊሱ ኣቶ ኣባዱላ ገመዳ፣ዶክተር ኣብዪ ኣህመድን ወ/ሮ ጫልቱ ሳኔን ኣብዚ ሕዚ እዋን ክቐርቡ ከምዘይኽእሉ ዝገለፅ ደብዳቤ ካብ ቤት ፅሕፈት ማእኸላይ ኮሚቴ ኦህዴው ከምዝበፅሖም ናይ ተኸሰስቲ ጠበቓ ኣቶ ኣምሃ መኮነን ገሊፆም።

ኣርባዕቲኦም ሰበስልጣን ኣብ ሃገራዊ ህፁፅ ኣኼባ ስለዝርከቡ ኣብዝተፀውዕሉ ቤት ፍርዲ ምስክርነት ንምሃብ ስለዘይኽእሉ እቲ ቤት ፍርዲ ንካልእ መዓልቲ ክቕይረሎም ምሕታቶም እቲ ደብዳቤ የረድእ።