ምስ ቅልውላው መስመር ቀይሕ ባሕሪ ተኣሳሲሩ ዋጋ ነዳዲ ወሲኹ

ኣመሪካን እንግሊዝን ኣብ ልዕሊ ዕጡቓት ሑቲ ናይ የመን ድሕሪ ዝወሰድኦ መጥቃዕቲ፡ ሎሚ ዓርቢ ዋጋ ነዳዲ ብ4% ምውሳኹ ሮይተርስ ሓቢሩ።

እቲ መጥቃዕቲ ኣብቲ ንኣስታት 15% ናይ ዓለማዊ ንግዳዊ ልውውጥ ዝሓልፈሉ መስመር ቀይሕ-ባሕሪ ምፍጻሙ፡ ነቲ ዞባ ብምሉእ ኣብ ሕጽረት ነዳዲ ከይሸሞ ስግኣታት ኣሕዲሩ ኣሎ።

ውህድ መጥቃዕቲ ኣመሪካን እንግሊዝን፡ “ኣብቲ ዞባ ንዝግበር ዝነበረ ናጻ ምንቅስቓስ መራኽብ ንዝተዓናቕፍ ሑቲ ዝተገብረ’ዩ፡” ክብል ፕረዚደት ኣመሪካ ጆ ባይደን ገሊጹ ኣሎ።

ወሃብ-ቃል ተቓለስቲ ሑቲ ግን ኣብቲ መስመር ንዝጓዓዛ መራኽብ እስራኤል ከጥቅዑ ምዃኖም ደጊሙ ገሊጹ ኣሎ።

ዓበይቲ ኩባንያታት መራኽብ ነቲ መስመር ኣወጊደን ብጽንፊ-ጽቡቕ-ተስፋ ናይ ደቡብ ኣፍሪቃ ክጓዓዛ ምውሳነን ኣብ ሕጽረት ቀረባትን ምውሳኽ ዋጋታትን ተራ ገይሩ ኣሎ።

ብምትእጕጓል እዚ መስመር ንግዲ ኣዝዩ ውሑድ ካብ ዝጽለዋ ሃገራት ሓንቲ ኣመሪካ ምዃና ቤተ-መንግስቲ ዋይት-ሃውስ ትማሊ ሓሙስ ገሊጹ።