ቦኮ ሓራም ጽኑዕ እስላማዊ ሕጊ ኣብ ሰሜን ናይጀሪያ ንምምስራት ዘመተ ካብ ዝጅምር ማሕበረሰባት ተበቲኖም፣ልዕሊ ክልተ ሚሊዮን ሰባት ተመዛቢሎምን 20ሽሕ ሰባት ድማ ተቐቲሎምን እዮም።
እቶም ደቆም ዝተጨወይዎም ስድራቤታት ድማ ምሒር እዮም ተሳቖዮም።ካብ ከተማ ቺቦክ ካብ ዝምሃራሉ መንግስታዊ ካልኣይ ደረጃ ቤት ትምህርቲ ኣብ 2014 ዓ.ም.ፈ ተጨውየን ካብ ዝተወሰዳ 219 ኣዋልድ ናይ ሓንቲ ወላዲ ያዋለ ዱኒያ ከምዚ ይብል።
‘ብዛዕባ ጓለይ ክሓስብ ከለኹ ከምዝሓመመ ሰብ ነብሰይ የንቀጥቅጠኒ።’
እቶም ዕጡቓት ቦኮ ሓራም ንመንበሪ እተን ተማሃሮ ብምውራር ዓፊኖም ወሲዶምወን።መንግስቲ ነቲ ቤት ትምህርቲ ዳግም ክሃንጾ እየ ኢሉ ቃል ኣትዩ ነይሩ እንተኾነ ግን ክሳብ ሕጂ ዋላ ሓደ ዝተሰርሐ ነገር ግን የለን።
ቦኮ ሓራም እዚ ከይኣኸሎ ኣብ ሕዳር 2014 ዓ.ም.ፈ እውን ንከተማ ቺቦክ ወሪሩ ንሓጺር እዋን ተቖጻጺሩዋ ነይሩ።ኣብ ጥሪ እውን ክልተ ርእሰ ቕትለታዊያን ኣብታ ከተማ ንዝርከብ ዕዳጋ መጥቓዕቲ ብምፍጻም ብዉሑዱ ን10 ሰባት ቀቲሎም።
ብዙሓት ስድራ እተን ዝተጨውያ ኣዋልድ ሃዲሞም እዮም።ገሊኦም ኣብ ዋና ከተማ እታ ክፍለ ግዝኣት ማይዱግሪ ይነብሩ ኣለው።
ኣኩኣ ንሓንቲ ዝተጨውየት ጓል የሪማ ኣጂ ከምዚ ይብል።
‘ብህይወት ኣላ ወይ ሬሳ ሪኢና ሞይታ’ላ ምበልናኮ ድሓን ነይሩ።ኣብ ጫካ ኢያ ዘላ፤ኣበይ ከምዘላ ግን ኣይንፈለጥን።’
ኣቦ መንበር ማሕበር ስድራ ዝተጨውያ ኣዋልድ ያኩቡ ንኬኪ እቲ ጃምላዊ መጭወይቲ ካብ ዝፍጸም ጀሚሩ 18 ወለዲ ናይተን ኣዋልድ ሞይቶም ኣለው፤ተደራራቢ ሓዘን እዩ ዘስዕብ ኣሎ ይብሉ።
እቲ መጭወይቲ ማህበረሰብ ዓለምለኸ ዝኾነኖ’ዃ እንተኾነ ኣስዒቡ ኣብ ዙሪያ ናይጀሪያ ዳርጋ መዓልታዊ ብዝብሃል ሰልፍታት ተኻየዱ እዩ።ሓድሽ ፕሬዝዳንት ናይጀሪያ እውን ነተን ኣዋልድ ክመልሰን እየ ሎሚ ቃል ኣትዮም ነይሮም።ዘድሓነን ግን የለን።
ወለደን እውን ብተስፋ ካብ ምጻባይ ወጻኢ ካልእ ኣማራጺ የብሎምን።
ምሉእ ትሕዝቶ ኣብዚ ምስማዕ ይክኣል።
ኣብ ዝኽሪ ካልኣይ ዓመት ጭውያ ንኣዋልድ ቺቦክ-ናይጀርያ ኣይንረሳዓየን
