ባይቶ ኢትዮጵያ ሓድሽ ሓላፊ ኮሚሽን ሰብኣዊ መሰላት መዚዙ

ባይቶ ወከልቲ ኢትዮጵያ ሎሚ ሰሉስ ኣብ ዘካየዶ ኣኼባ ሓዲሽ ሓላፊ ኮሚሽን ሰብኣዊ መሰላት ኢትዮጵያ ሸይሙ። ነቲ ባይቶ መብርሂ ዝሃበ ኣፈጉባኤ ባይቶ ኣቶ ታገሰ ጫፎ፡ ኮሚሽነር ብርሃኑ ኣዴሎ ብዙሓት ዝተወዳደርሉ መስርሕ ሓሊፉ ዝተዓወተ ክብል መስኪርሉ።

ካብ ተቓወምቲ ኣባል ቤት ምኽሪ ዶ/ር ደሳለኝ ጫኔ ግን፡ ኣቶ ብርሃኑ ኣብ ዘመነ-ስልጣን ኢህወደግ ልዑል ስልጣን ዝነበሮ ስለዝኾነን ናይ ሻራውነት ሕቶ ስለ ዘልዕልን ኣብቲ ንሱ ዝመርሖ ትካል ኣሉታዊ ምስሊ ከየሕድር ስግኣቱ ኣስሚዑ`ሎ።

“ብግልጺ ዝርኣይ ናይ ፖለቲካ ሻርነት ዘይብሎም ሰባት ተሳኢኖም ድዮም?" ክብል`ውን ሓቲቱ።

መልሲ ዝሃበ ኣፈ-ጉባኤ ብወገኑ፡ ኣቶ ብርሃኑ ኣብ ዝሓለፈ 15 ዓመታት ኣብ ናይ ብሕቲ ስራሕ ምምኻር ሕጊ እዩ ጸኒሑ ክብል መሊሱ።

ንኮሚሽን ሰብኣዊ መሰላት ኢትዮጵያ ክመርሕ ብባይቶ ተሸይሙ ዘሎ ኣቶ ብርሃኑ ኣዴሎ፡ኣብ ኢህወደግ ክሳብ ኣባል ፈጻሚ ኮሚቴ በጺሑ ዝነበረ`ዩ።