ዋሕዚ ስደተኛታት ናብ ኣውሮጳ ንምግታእ ኢጣልያ ምስ ሰበ ስልጣን ሊብያ ምትሕግጋዝ ካብ ትጅመር ዝበዝሓ ሰባት ካብ ማእከላይ ባሕሪ ዝደሓንሉ ክስተት ምኳኑ ዝተገልጸ እዚ ስርሒት ህይወት ኣድሕን ዝደሓኑ 600 ስደተኛታት ኢጣልያ ኣትዮም።
መብዛሕትኦም ካብ ትሕተ ሰሃራ ኣፍሪቃ ምኳኖም ዝተገልጸ እዞም ስደተኛታት ትሕተ ዕድመ ህጻናት ዝርኸብዎም ምኳኑ’ውን ተሓቢሩ’ሎ።
እዞም ስደተኛታት ድሕሪ እቲ ንዝሓለፈ ሰለስተ ሰሙን ኣብ ከባቢ ከተማ ሳባርታ ሊብያ ኣብ መንጎ ዕጡቓት ሚሊሻ እታ ሃገር ክኻየድ ዝጸንሓ ግጭት ዝደሓኑ ኮይኖም እቲ ግጭት ንብዙሓት ስደተኛታት ምዝንባሉ ተፈሊጡ’ሎ።
ኣብ ማእከላይ ባሕሪ ናይ ህይወት ኣድሕን ስርሒት ዘካይድ ትካል ኤስኦኤስ ሚደተራንያ ፕረዝደንት ቫለርያ ካላንደራ እቲ ኣብ ሊብያ ዝረአ ዘሎ ዘይምርግጋእ ንቁጽሪ እቶም ንማእከላይ ባሕሪ ብምቁራጽ ናብ ኣውሮጳ ዝጉዓዙ ቁጽሪ ስደተኛታት ምውሳኹ ይገልጹ።
ናይ ሕቡራት ሃገራት ትካል ስደተኛታት ብወገኑ እቲ ኣብ ከባቢ ከተማ ሳባርታ ዝተራእየ ግጭት ንኣስታት 3000 ስደተኛታት ኣብ መንጎ ምቕርቓሮም ካልኦት 10,000 ድማ ምዝንባሎምን ህጹጽ ሓገዝ ከምዝደልዮም ሓቢሩ’ሎ።
እዚ ከምዚ ኢሉ ከሎ ኣብ መዳጎኒ ስደተኛታት ሊብያ ዝርከቡ ስደተኛታት ኣብ ዝኸፍአ ኩነታት ከም ዝርኸቡ ይግለጽ ኣሎ።
እዞም ናብ ኣውሮጳ ንምጉዓዝ ኣብ ሊብያ ዝተታሕዙ ስደተኛታት እኹል ቦታ፡ መግብን ኣገልግሎት ንጽህና ኣብ ዘይረኽብሉ መዳጎኒ ማእከላት ከምዝርኸቡ እስካይ ኒውስ ዝተባህለ መሓውር ዜና ኣብ ዘዳለዎ ፉሉይ ጸብጻብ ይሕብር።
