ወርሻታት ቀዳማይ ምንስቴር መለስ ዜናዊ

ቀዳማይ ምንስቴር ኢትዮጵያ ኣቶ መለስ ዜናዊ ኣብ መበል 57 ዓመቶም ዓሪፎም።መንግስታዊ ቴለቪዥን ኢትዮጵያ ኣብ ወፃኢ ክሕከሙ ድሕሪ ምፅንሖም ምዕራፎም ሎማዕንቲ ሰሉስ ኣዊጃ’ላ።ድሕሪ ናይ ልዕሊ 20 ዓመታት ስልጣኖም ውርሻ ቀዳማይ ምንስቴር መለስ በቲ ሓደ ገፅ ኣብ ኢትዮጵያ ቕልጡፍ ዕብየት ብምርግጋፅ ብኻሊእ መልክዑ ድማ ኩሎም ዓይነታት ተቓውሞታት ብምዕፋን ይዝከሩ።

ቀዳማይ ምንስቴር መለስ ዜናዊ ንስርዓት ደርጊ ንዝደምሰሰ ኢህወድግ ብምምራሕ ኣብ 1991 ኣ/ፈ መንግስታዊ ስልጣን ሒዞም።ኢህወደግ ንዓሰርተታት ኣሽሓት ተቓወምቲ ኢትዮጵያዊያን ንዝኣሰረን ንዝረሸነን ኮምንስታዊ መላኺ ስራዓት ደርጊ ንኸብቅዕ ገይሩ እዩ።

ቀዳማይ ምንስቴር መለስ ዜናዊ ኢትዮጵያ ካብ ዓዘቕቲ ድኽነት ንኽትወፅእ ብምግባሮም ይንኣዱ።

ገዛኢ ፓርቶም ብሕቡራት መንግስታት ዝተሓንፀፀ ሸቶታት ልምዓት ምልኒየም ኣካል ሃገራዊ ፖሊስ ንክኸውን ገይሩ እዩ።ብመሰረት ሕቡራት መንግስታት እታ ሃገር ኣብቶም ዝሓለፉ ሸውዓተ ዓመታት 60 ሚእታዊ በጀታ ኣብ ሕርሻ፡ኣብ ትምህርቲ፡ጥዕናን ኣብ ካልኦት ካብ ድኽነት ዘውፅኡ ዘፈራትን ኣውዒላቶ እያ።