ኣመሪካ፡ ፖሊስ መይን 16 ሰባት ንዝቐተለ ጥርጡር ይሃድኑ

ፖሊስ ክፍለ ግዝኣት መይን ኣመሪካ ለዊስተን ኣብ እትብሃል ከተማ 16 ሰባት ቀቲሉ ካልኦት ብዙሓት’ውን ኣቝሲሉ ንዝተሰወረ ጥርጡር ኣብ ምንዳይ ኣለዉ። ፖሊስ ነቲ ኣሰቃቒ ጃምላዊ ቅትለት ዝፈጸመ ዜጋ ኣብ ምስልጣን ተዅሲ ዝነጥፍ ምዃኑ ኣለልዩዎ ከም ዘሎ ኣገልግሎት ዜና ኣሶሴይትድ ፕረስ ኣመልኪቱ።

ረቡዕ ምሸት ኣብ ክልተ ባራት ዝተፈጸመ ጃምላዊ መቕተልቲ ነታ ብዕብየታ ኣብታ ክፍለ-ሃገር ካልኣይቲ ዝዀነት ከተማ ለዊስተን ኣብ ራዕዲ ኣእትዩዋ ምህላዉ ኣሶሴይትድ ፕረስ ሓቢሩ።

ፖሊስ መይን ሮበርት ካርድ ዝተባህለ ውልቀሰብ ምዃኑ ኣለልዩዎ ዘሎ ዜጋ፡ ኣቐዲሙ ከም ኣባል ዕቑር ሰራዊት ኣመሪካ ሰልጢኑ ዝነበረን ኣብዚ ዓመት ድማ ንኣገልግሎት ጥዕና ኣእምሮ ኣብ ሆስፒታል ተሓኪሙ ምንባሩን ተፈሊጡ'ሎ።

መኪና ጥርጡር ሊዝበን ኣብ እትብሃል ከተማ መይን ድሕሪ ምርካባ፡ ተደላዪ ኣብቲ ከባቢ ክህሉ ስለ ዝኽእል፡ ነበርቲ ዘድሊ ጥንቃቐ ክግበሩን ካብ ገዛ ከይወጽኡን ፖሊስ ኣተሓሳሲቡ ኣሎ።

ጥርጡር፡ ኣቐዲሙ’ውን ንማእከል ወታሃደራዊ መሰልጠኒ ሳኮ-መይን ክጠቅዕ ከም ዝኽእል ኣፈራሪሑ ምንባሩ ድሒሩ ኣብ ዝተዘርግሐ መዛግብቲ ጥርጡር ተጠቒሱ ኣሎ።