ሰበ-ስልጣን ሊብያ 350 ስደተኛታት ናብ ሃገሮም ግብጺ መሊሶም

ሰበ-ስልጣን ሊብያ ትማሊ ረቡዕ ን350 ስደተኛታት ናብ ሃገሮም ግብጺ ምምላስ ከም ዝጀመሩ በዓል-ስልጣን ኢምግረሽን ንኣገልግሎት ዜና ኣጃንስ ፍራንስ ፕረስ ሓቢሩ።

ብኵናት ዝተሓመሰት ሊብያ ናብ ኤውሮጳ ንዝሰግሩ ኣፍሪቃውያን እንተላይ ግብጺ መሰጋገሪት ኮይና ምጽንሓ ይፍለጥ። ብዙሓት ግብጻውያን ንኤውሮጳ ንምሕላፍ ከምኡ`ውን ኣብ ሕርሻን ህንጻን ንምስራሕ ናብ ሊብያ ክስደዱ ጸኒሖም `ዮም።

ተቐናቐንቲ ምምሕዳራት ሊብያ ነቶም ኣብታ ሃገር ዘለዉ ስደተኛታት ናብ ሃገራቶም ኣብ ምጥራዝ ብሓባር ክሰርሑ ዝሓለፈ ዓመት ምስምማዕም ይዝከር።

ሊብያ ዝሓለፈ ወርሒ ሕዳር፡ 600 ስደተኛታት ናብ ግብጺ መሊሳ`ያ። ልዕሊ 23 ሺሕ ስደተኛታት ድማ ናብ ናይጀርያ ጠሪዛ።

መራሒ ሊብያ ዝነበረ መዓመር ቐዛፊ ኣብ 2011 ካብ ዝቕተል ንድሓር፡ ሊብያ ንኣሰጋገርቲ ደቂሰባት ምችእቲ ባይታ ኮይና ምጽናሓ ይፍለጥ።