ኣብ ሆሮጉድሩ ወለጋ 13 ሰባት ብዕጡቓት ምቕታሎም ነበርቲን ሰብ-መዚ'ቲ ከባቢን ይሕብሩ

ኣብ ኢትዮጵያ ሆሮጉድሩ ወለጋ ዕጡቃት ብዝፈጸምዎ መጥቃዕቲ 13 ሰባት ከምዝተቀትሉ ኣመሓዳሪ ቀበሌ ጆጅ ኣቶ ሲሳይ ኣባዋ ገሊጾም።

ኣቶ ሲሳይ ኣባዋ ንድምጺ ኣመሪካ ኣብ ዝሃብዎ ርእይቶ ናብ ዕለታዊ ስራሕ ምህርቲ ንምእካብ ዝወፈሩ 13 ሰባት ናብ ወረዳ ቡሬ ከምዝወረዱን ብዕጡቃት ፋኖ ምቅታሎምን ሓቢሮም።

ናይ ዓይኒ ምስክር እየ ዝበሉ ውልቀሰብ ብወገኖም ነቲ ቅትለት ዝፈጸሙ ዕጡቃት፣ ካብ ምብራቅ ወለጋ ቀበሌ ሃሮ ዝመጹ እዮም ይብሉ።

እዚ ከምዚ'ሉ ከሎ፣ ኣብ ወረዳ ቡሬ ንዝንቀሳቀስ ውዳበ ፋኖ ይመርሕ እየ ዝበሉ ሻለቃ ጌታሁን በሬ ንድምጺ ኣመሪካ እቲ ቅትለት ዝተፈጸመሉ ከባቢ ኣብ ትሕቲ ሰራዊት ፌደራል መንግስቲ ዝርከብ ምዃኑ ይገልጹ።

ሻለቃ ጌታሁን ወሲኾም ኣብ ልዕሊ ሰላማዊያን ሰባት ዝፍጸም መጥቃዕቲ ዝኹነን እዩ ካብ ምባል ሓሊፎም ሓላፍነት ከምዘይወስዱ ንወኪል ድምጺ ኣመሪካ ሓቢሮም ኣለው።