ኣብ ሰ.ኬንያ ክልተ ዜጋታት ደ/ኮርያ ምቕታሎም ተገሊጹ

ኣብ ምስ ኢትዮጵያ ዘዋስን ከባቢ ሰሜናዊ ኬንያ ብቕድሚ ትማሊ ብሰኑይ ክልተ ደቡብ ኮርያውያን ሚስዮናውያን ከምዝተቀትሉን ኣብ ካልእ ፍጻመ ድማ ኣብቲ ዞባ ሸሞንተ ኬንያውያን ከም ዝተቀትሉ ተገሊጹ።

ንሰበ-ስልጣን ወረዳ ማርሳበት ብምጥቃስ ጋዜጣ ዘ ስታንዳርድ ከም ዝሓበሮ እቲ ደቡብ ኮርያዊ ውልቀሰብ ምስ ሓማቱ ካብ ቁሸት ኦዳ ብሰኑይ ምሸት ሰዓት 9፡00 ከም ኣቆጻጽራ እታ ሃገር ካብ ገዝኦም ከምዝተወስዱ ይሕብር ።

ሞባይል ተሌፎኑ ናይ መወዳእታ ምልክት ዘርኣየቶ ኣብቲ ምስ ኢትዮጵያ ዘዋስን ከባቢ ምንባሩን ኣገልግሎት ዜና ሮይተርስ ሓቢሩ'ሎ።

እቲ ትካል ዜና ወሲኹ ናይ "ዱር ክዳን" ዝተኸድኑ ዝበሎም ዕጡቓት ካብ ከተማ ሞያለ 100 ኪ.ሜ ኣቢሉ ንሸሞንተ ሰባት ብጥይት ቀቲሎም ንሬሳታቶም ምስታ ዝጓዓዙላ ዝነበሩ ናይ ጽዕነት መኪና ጌሮም ብሓዊ ከምዘንደዱ ይሕብር።

እቲ ንኢትዮጵያን ኬንያ ኣብ ዘዋስን ከባቢ ዘሎ ኣጻምእ ከባቢታት ዕጡቃት ተደጋጋሚ መጥቃዕታት ከካይዱ ዝተለመደ ተርእዮ ኮይኑ ዝሓለፈ ዓመት መንግስቲ ሰርሒት ጸጥታ ብምክያድ ንሸፋቱ'ቲ ከባቢ ብረቶም ከውርዱ ብምግባር ህድኣት ሰፊኑ ጸኒሑ'ዩ።