ቀ/ሚ ጃፓን ኣብ ዝመጽእ ምርጫ ንመሪሕነት ፓርቲኦም ከምዘይወዳደሩ ኣፍሊጦም

ቀዳማይ ሚኒስተር ጃፓን ፉምዮ ከሺዳ ኣብ ዝመጽእ ምርጫ ንመሪሕነት ፓርቲኦም ከምዘይወዳደሩ ኣፍሊጦም። እዚ ማለት ናይ መዝነት ጊዚኦም ኣብ ዝመጽእ ወርሒ መስከረም ምስ ኣብቅዐ ጃፓን ሓድሽ ቀዳማይ ሚኒስተር ክህልዋ እዩ ።

ፉምዮ ከሺዳ ፕረዚደንት ፓርቲኦም ሊበራል ዲሞክራቲክ ፓርቲ ኮይኖም ዝተመረጹ ኣብ 2021'ዩ። ንሶም ካብ መሪሕነት ፓርቲኦም ወሪዶም ማለት ሓድሽ ዝምረጽ ሰብ መሪሕነት ፓርቲኡ ይሕዝ፡ ንቦታ ቀዳማይ ሚኒስተር ከኣ ክትክኦም እዩ።ምኽንያቱ ፓርቲኦም ንኽልቲኡ ባይቶታት እታ ሃገር ስለ ዝዕብልል እዩ።

ከሺዳ ፓርቲኦም ብወረ- ብልሽውና ስሙ ስለዝጸለመ ንመሪሕነቶም ዝነበረ ደገፍ ክሳብ ትሕቲ 20 ሚእታዊት ምውራዱ ክግለጽ ጸኒሑ'ዩ።