ክልል ትግራይ፡ ኣብ ወረዳ ኣፅቢ ብሰንኪ ጥምየት 111 ሰባት ምሟቶም ምምሕዳር'ቲ ዞባ ሓቢሩ

ኣብ ዞባ ምብራቕ ትግራይ ወረዳ ኣፅቢ ኣብ ዝሓለፉ ሰለስተ ኣዋርሕ ጥራሕ ብሰንኪ ጥምየት 111 ሰባት ህይወቶም ምሕላፉ ምምሕዳር እታ ወረዳ ኣፍሊጡ። ሓላፊ ዓውዲ ቁጠባ እታ ወረዳ ኣይተ ብርሃነ ገብረ፡ ኣብ ዝሓለፈ ክራማት ኣብቲ ወረዳ እኹል ዝናብ ብዘይምዝናቡ ልዕሊ 82-ሽሕ ህዝቢ ንጥምየት ተሳጢሑ ክብሉ ንድምፂ ኣመሪካ ገሊፆም።

ኣብ ወረዳ ኣፅቢ ዝተረኸበ ምህርቲ ነቲ ህዝቢ ን11 መዓልታት ጥራሕ ዝቕልብ እዩ ዝበሉ እቶም ሓላፊ፡ ሓገዝ እኽሊ እንተዘይቀሪቡ ቑፅሪ መወቲ ብዝልዓለ መጠን ክውስኽ ይኽእል እዩ ኢሎም። ኣብ ፀገም ዝርከቡ ነበርቲ እታ ወረዳ ብግዲኦም "ሞትና ኣብዚ ኾይንና ንፅበ ኣለና" ይብሉ።