መሰጋገሪ ቤት ምኽሪ ሀይቲ ቀዳማይ ሚኒስተር መሪጹ

መሰጋገሪ ቤት ምኽሪ ሀይቲ ድሕሪ ኣስታት ሓደ ወርሒ ዝወሰደ ውሽጣዊ ዝርርብ፡ ንጋርይ ኮኒል ቀዳማይ ሚኒስተር ጌሩ ሸይሙ። ቅድሚ ሕጂ ኣብ ሕቡራት ሃገራት ፕሮግራም ልምዓት ተመኵሮ ዘለዎ ኮኒል፡ ኣብ ውሽጢ’ቲ መሰጋገሪ ቤት ምኽሪ ዝተሓርየ ሰብ ብኻልእ ወገናት ተቓውሞ ድሕሪ ምግጣሙ’ዩ ንሱ ተመሪጹ።

እንተዀነ፡ ትማሊ ሰሉስ ንሓድሽ መሰጋገሪ ቀዳማይ ሚኒስተር እታ ኣብ ካሪብያን እትርከብ ሃገር ድሕሪ ምግላጹ፡ ርእሰ-ከተማኣ ፖርት-ፕሪንስ’ውን ብመጥቃዕቲ ጭፍራ ዓዋሉ ተሃዊኻ ውዒላን ኣምስያን። ትማሊ ሰሉስ ኣብ ሓደ ገዛውቲ እታ ርእሰ-ከተማ እቶም ጭፍራ፡ ብኸቢድ ብረት ዝተሰነየ መጥቃዕቲ ገይሮም፡ ንመደበራት ፖሊስን ኣብያተ-ማእሰርቲን ክቆጻጸሩ ፈቲኖም።

ሀይቲ፡ ንነዊሕ ኣዋርሕ ብዘይ ብዑቕ መንግስታዊ ምምሕዳር፡ መብዛሕትኡ ብጭፍራ ዓዋሉ’ያ እትመሓደር ዘላ።