ስነ-ስርዓት ኣከባብራ ሓድሽ ዓመት ኢትዮጵያን ዘንጸላልዎ ናህሪ ዋጋን ዝቕባብን

ሎሚ ኢትዮጵያውያን ኣብ ሃብታም ባህሎምን ልምዶምን ዝሰረተ ሓዲሽ ዓመት የኽብሩ`ለዉ። እንተኾነ ኣብታ ሃገር እናነሃረ ዝኸይድ ዘሎ ዝቕባበ ገንዘብን፡ ፖለቲካዊ ዘይምርግጋእን ከይተንከፎም ኣይተረፈን።

ጽርግያታት ኣዲስ ኣበባ ብዕንባባታት ገለገለ መስቀለ ደሚቑ መንፈስ ኣውደኣመት ዓሲልዎ ይርኣይ ፡በቲ ሓደ ወገን ግን ብድሆታት ዝቕባበን ፖለቲካዊ ዘይርግኣትን ብግልጺ ይርኣይ።

ውዕዉዕ ዕዳጋ ኣዲስ ኣበባ ናይ ኣውደኣመት ድባብ ሰፊኑዎ ዝርኣይ`ኳ እንተኾነ ፡ናህሪ ዋጋ ግን ንሸማቶ ሕማም ርእሲ ኮይንዎም ከም ዝወዓለ ኣብ ገጾም ይንበብ።

ዋጋ ሽጉርቲ፥ ዋጋ ደርሆ ከምኡ`ውን ዋጋታት ቀመማ ቀመማት ነቲ መሪር ክውንነት ዘንጸባርቕ `ዩ። ሸማቶ ኣብ ዝዋገይሉ እዋን ኣብ ገጾም ስንባደ ይንጸባረቕ።

ኣዳነች መለሰ ሓንቲ ካብኦም`ያ። ቀደም ኣብ ጽርግያታት ኣዲስ ኣበባ ኣሕምልቲ እናሸጠት ትናበር እኳ እንተበረት፡ ብሰንኪ ሕጽረት ኣከፋፈልትን፡ ነጋዶ ዝወሰኹላ ዋጋን፡ ኣሕምልቲ ምሻጥ ደው ኣቢላ ሕጂ ንባዕላ ንኣውደኣመት ዝኸውን ደርሆን ሽጉርትን እንተረኸበት ናብ ዕዳጋ ወሪዳ`ላ። ዝጸንሓ ዋጋ ክትሓስቦ ዘይትኽእል ስለዝኾና ግን ክትገድፎ ትደናደን ዝነበረት ትመስል።

ሱር ጠንቂ ናህሪ ዋጋ እንታይ ይኸውን ዝብል ትንተና ክህብ ዝተሓተተ ፍሉጥ ክኢላ ቁጠባ`ታ ሃገር ኮንስጣንጢኖስ በርሀ፡ ኣብ መንጎ ቀረብን ጠለብን ዘሎ ጋግ እናገፍሐ ምኻዱ ምዃኑ ድሕሪ ምጥቃስ፡ ኣብታ ሃገር ዘለዉ ዝተፈላለዩ ግጭታት ቀንዲ ጠንቂ ቁጠባዊ ቅልውላው ኢትዮጵያ ምዃኖም ብብትሪ የስምረሉ።

ምስቲ ኩሉ ተጻብኦታት ግን ኢትዮጵያውያን ንሓዲሽ ዓመቶም ብወኒ ንምኽባር ጽኑዓት ኮይኖም ምስ ቀጸሉ`ዮም።

ከተማ ኣዲስ ኣበባ ንሓዲሽ ዓመት ዘንጸባርቕ ድሙቕ ባህሊን ልምድን ዓሲልዋ ትርኣይ። ጎሊሑ ዝርኣይ ባህላዊ ሳዕሲዕትን ማሕበረሰባዊ ምትእኽኻባትን ምስክርነት ዘይተጸዓድነት ህዝቢ ኢትዮጵያ ዘንጸባርቕ ኮይኑ ይርኣይ።

ደቀንስትዮ ብሕብራዊ ኣከዳድና ደሚቐን ኣብ ምልእቲ`ታ ከተማ ብምዛር ቀጻልነት ባህላዊ ውርሽአን ከረጋግጻ ይርኣያ።

ስድራቤታት ኣብ ሓዲሽ ዓመት ተሓጉሶም ክውዕሉ፡ ኩሉ ምቅርራባት ይገብሩ፡ ሽሕ`ኳ ብሰንኪ ናህሪ ዋጋ ኣብ መደባቶም ምትዕርራያት ክገብሩ ግድን እንተኾነ ፈስታ ሓዲሽ ዓመት ግን ይቕጽል።