ስምምዕ ምቁራጽ ተጻብኦ ሓማስን እስራኤልን

ቀዳማይ ሚንስተር እስራኤል በንያሚን ነተንያሁ ብሓማስ ዝተታሕዙ ጅሆ ንምምላስን ነቲ ን15 ኣዋርሕ ዝቐጸለ ግጭት ንምዕራፍን ውዕል ከም ዝተገብረ ኣፍሊጡ። ካብ ቤት ጽሕፈት ቀዳማይ ሚንስተር ዝወጸ መግለጺ ፡ ካቢነ እስራኤል ነቲ ውዕል ንምጽዳቕ ሎሚ ዓርቢ ክእከብ`ዩ ይብል።

እስራኤላውያን 98 ጅሆ ተታሒዞም ዘለዉ ዜጋታቶም ክምለስዎም ይጽበዩ ኣለዉ።ገሊኦም ዝሞቱ`ዮም። ሓማስ ኣብ 7 ጥቅምቲ 2023 ናብ ውሽጢ ደቡባዊ እስራኤል ብምእታው 1,200 ሰባት ድሕሪ ምቕታሉ ዝሓዞም `ዮም።

ካብ ድሕሪ ጽባሕ ሰንበት ዝጅምር ቀዳማይ ደረጃ`ቲ ስምምዕ ምቁራጽ ተኹሲ፡ ሓማስ ደቀንስትዮ፡ ቆልዑትን ዓበይትን ዝርከብዎም 33 ሰባት ክለቅቕ `ዩ። እስራኤል ድማ ከም ግብረ-መልሲ ብኣማኢት ዝቑጸሩ ፍልስጤማውያን እሱራት ክትፈትሕ`ያ።

እንተኾነ ገለ እስራኤላውያን፡ ሓማስ ቃሉ ከኽብር እንተኾይኑ ይጠራጠሩ። ዛጊት ሓማስ ዝርዝር ናይቶም ሒዝዎም ዘሎ ጅሆ ንምሃብ ፍቓደኛ ኣይኮነን።