ኣብ ዓለምለኸ ውድድር ሮቦት ዋሽንግተን ዲሲ ዝተሳተፈት ጋንታ ቡሩንዲ ተሰዊራ

ሽዱሽተ መንእሰያት ዝኣባላታ ኣብ ዓለምለኸ ውድድር ሮቦት ዋሽንግተን ዲሲ ዝተሳተፈት ጋንታ ቡሩንዲ: ድሕሪ'ቲ ግጥማት ከምዝተሰወረት ተሓቢሩ።

ዓለምለኸ ውድድር ሮቦት ዋሽንግተን ዲሲ ተማሃሮ ኣብ ዓውድታት ፍልጠት ሕሳብን ሳይንስን ከተኩሩ ዝተባብዕ ኮይኑ ካብ 150 ሃገራት ከምዝተሳተፍዎ ድማ ተገሊጹ።

ኣዳለውቲ መደብ ዓለምለኸ ውድድር ሮቦት ዋሺንግተን ዲሲ: ምጥፋእ ኣባላት ጋንታ ቡሩንዲ ዝሓለፈ ሰሉስ ከምዝተሓበሮምን ብኡንብኡ ድማ ንፖሊስ ምሕባሮም ተጠቒሱ።

ጋንታ ሮቦት ቡሩንዲ ኣርባዕተ ደቂ ተባዕትዮን ክልተ ደቂ ኣንስትዮን ዝሓቖፈት እያ። እተን ደቂ ኣንስትዮ 17 ዝዕድመአን ክኾና ከለዋ: እቶም ደቂ ተባዕትዮ ድማ ካብ 16 ክሳብ 18 ዝዕድሚኦም ከምዝኾኑ ብተወሳኺ ተፈሊጡ።