ኮሚሽን ሰ/መሰላት ኢትዮጵያ ኣብታ ሃገር ዝረኣዩ ግህሰታት ከይቕጽሉ ጸዊዑ

ኣብ ኢትዮጵያ ዝቐጸሉ ግጭታት ብሰላማዊ ኣገባብ ኣብ ምፍታሕ ኣብ 2015 ዘተባብዑ ጻዕሪታት ከምዝተገበሩ ዝጠቅስ ኮምሽን ሰብኣዊ መሰላት’ታ ሃገር፣ ሎሚ’ውን ግህሰት መሰላት ይፍጸሙ ስለዘለው፣ ኣብ’ዚ ሓድሽ ዓመት’ውን ንከይቅጽሉ፣ ኣብ ትሕቲ ሕጊ ፍታሕ ንክግበረሎም ጸዊዑ።

ምክትል ፕረዚደንት’ቲ ትካል ራኬብ መለሰ "ግጭታትን መጥቃዕትታትን፣ ኣብ መሰላት ብህይወት ምንባርን ምንቅስቃስን ዘውርድዎ ዘሎ ግህሰት ዘተሓሳስብ እዩ" ኢለን።

ኣብ ዩኒቨርሲቲ ሃዋሳ መምህር ዓውዲ ሕጊ በፈቃዱ ድሪባ ብወገኖም ኣብ ዝተፈላለዩ ከባቢታት ዘለው ግጭታት፣ ግህሰት መሰላት የስዕቡ ስለዘለው፣ ኣብ ክንዲ ወትሃደራዊ ስጉምቲ፣ ፖለቲካዊ ኣማራጺ ምጥቃም ኣገዳሲ ምዃኑ ጠቂሶም።

ኣብ 2015 ብሕልፊ ኣብ ሰሜን ኢትዮጵያ፣ ክልላት ትግራይን ኣምሓራን፣ ኣብ ክልላት ኦሮምያን ደቡብ ኢትዮጵያን ዝተፈላለዩ ግጭታትን ኲናትን ከምዝነበሩ ዝዝከር እዩ።