ኣብ ዞባ ሃድያ ዝተኣሰሩ መንእሰያት መሰል ዋሕስ ከምዝተነፍጎም ስድራን ነበርቲን ይሕብሩ

ኣብ ማእከላይ ኢትዮጵያ ዞባ ሃድያ ወረዳ ሶሮ፡ ካብ ዝሓለፈ ወርሒ ጀሚሮም 14 መንእሰያት በዘፈቀደ ምእሳሮም ቤተሰቦምን ነበርቲን ንድምጺ ኣመሪካ ሓቢሮም። እቶም ተኣሲሮም ዝርከቡ ሰባት ናይ ዋሕስ መሰል ከምዝተነፍጎም`ውን ተሓቢሩ'ሎ።

ምምሕዳር`ታ ወረዳ ኣቶ ደስታ ዴቶሬ ብወገኑ፡ እቶም መንእሰያት ዝተኣስሩ ኣብ ምስረታ ማሕበር ልምዓት ዳንጣ ብምስታፎም`ዩ ይብል። ኣስዒቡ፡ ካልኦት ብገበን ዝጥርጠሩ ይድለዩ ከምዘለዉ`ውን ኣፍሊጡ።

እቶም መንእሰያት ኣብ ምስረታ ማሕበር ልምዓት ዳንጣ ምስታፎም ናይ መንነት ሕቶ ከም ምልዓል ተሓሲቡ ከም ዝተኣስሩ፡ እዚ ድማ ንብሄረሰብ ዳንጣ ንምዕፋን ብመንግስቲ ዝግበር ውዲት`ዩ ክብሉ ኣባላት ስድራቤት እቶም ተኣሲሮም ዘለው መንእሰያት ይኸሱ።