ሓላፊት ቦርድ ምርጫ ኢትዮጵያ ብፍቓደን ካብ መዝነተን ለቒቐን

ሓላፊት ኮሚሽን ቦርድ ምርጫ ኢትዮጵያ ኮይነን ንዝሓለፉ ኣርባዕተ ዓመታትን ሽዱሽተ ኣዋርሕን ከገልግላ ዝጸንሓ ወ/ት ብርቱኳን ሚደቅሳ በገዛእ ፍቓደን ካብ መዝነተን ምልቃቐን ሎሚ ሶኑይ 26 ሰነ 2023 ኣፍሊጠን።

ንሰን ንውሳነኣን ብወግዒ ኣብ ዘፍለጣሉ እዋን "ጥዕናይ ብዝግባእ ንምሕላው ነዊሕ ዕረፍቲ ስለዘድልየኒ ካብ 1 ነሓሰ 2015 ጀሚረ ካብ ሓላፍነተይ ብድልየተይ ምልቃቐይ ንኣፈ ጉባኤ ቤት ምኽሪ ወከልቲ ህዝቢ ኣፍሊጠ ኣለኹ" ኢለን።

ወ/ት ብርቱካን ሓቢረንኦም ንዝሰርሑ መሳርሕተን ብምምስጋን ብፍላይ ድማ ስርሓን ዝተማልአ ክኸውን ዝሓግዝአን ህርኩታት ናይቲ ቦርድ ኣባላት ደቂ ኣንስትዮ ንኢደን።

ነቲ ቦርድ ንክመርሓ ንዝሓጹየን ቀዳማይ ሚንስተር ኣብይ ኣሕመድን እውን ኣመስጊነን ኣለዋ።