ፈላማይ ልዝብ ኣብ ዙርያ ስምምዕ ኣንካራ ኢትዮጵያን ሶማልያን ተኻይዱ

ላዕለዎት ዲፕሎማት ኢትዮጵያን ሶማልያን ኣብ መንጎ ኢትዮጵያን ሶማሊላንድን ብዝተፈረመ ናይ መረዳድኢ ሰነድ ዝተወልዐ ምስሕሓብ ንምፍታሕ ናይ መጀመርታ ዙር ቴክንካዊ ዝርርብ ምክያዶም ቱርክየ ምግላጻ ኣሶሴይትድ ፕረስ ሓቢሩ።

ኣፍደገ ባሕሪ ዘይብላ ኢትዮጵያ ኣብ ዝሓለፈ ዓመት ኣብ ወሰን ባሕሪ ሶማሊላንድ መደብር ሓይሊ ባሕሪ ብሊዝ ንምክራይ ናይ መረዳድኢ ሰነድ ድሕሪ ምፍራማ ኣብ መንጎ ክልቲኣን ሃገራት ወጥሪ ፈጢሩ ፀኒሑ እዩ።እቲ ስምምዕ ኢትዮጵያ ኣምሳይኡ ንሉኣላውነት ሶማሊላንድ ወግዓዊ ኣፍልጦ ምሃብ ዝብል'ዩ ኔይሩ። እቲ ዝቕፅል ዙር ዝርርብ ኣብ መጋቢት ከም ዝኸውን ቱርክየ ገሊፃ ኣላ።