እቲ ኣብ ሊብያ ዘሎ ኩነታት ካብ ትሕቲ ሳሃራ ንዝኾኑ ስደተኛታት ኤርትራውያንን ኢትዮጵያውያንን ሓዊሱ ኣዝዩ ክፉእ ምኻኑ ብምግላፅ መንግስታት ንዜጋታተን ካብ ሊብያ ኣብ ዘውፅአሉ እዋን ነዞም ዘውፅእኦም ነፈርቲ ኾነ መራኽብ ዘይብሎም ሰደተኛታት ክሓስብኦም ላዕለዋይ ኮሚሽነር ጉዳይ ስደተኛታት ሕቡራት መንግስታት ኣንቶንዮ ጉተራስ ተማሕፂኖም።
ወሃቢት ቃል ትካል ስደተኛታት ሕቡራት መንግስታት ስቢላ ወልክስ ብወገነን ካብ ጄኔቫ ከምዝበለኦ ብዙሓት ስደተኛታት ትሕቲ ሳሃራ አፍሪቃ ክአትውን ክወፁን ከምዘይከአሉን ከም ዕሱባት ወታሃደራት ተራእዮም መጥቃዕቲ ይወርዶም ከምዘሎ ገሊፆምልና ኢለን፡ ኩነታቶም ነቃላሓሎም እለና ብምባል ንኩነታት ኤርትራውያን ስደተኛታት ጠቂሰን።
እዚ ኸምዚሉ ኸሎ ጣልያን ቆልዓ ሰበይቲ ዘለውዎም ስድራ-ቤታት ዝሓዙ 54-ኤርትራውያንን ኢትዮጵያውያንን ከም ዘውፀኤት ኣባ ሙሴ ዘርአይ ካብ ሮማ ጣልያን ገሊፆም።
