ዱባይ: ሓደ ካብ ዝነውሐ መንበሪ ህንጻታት ዓለም ባርዕ ሓዊ ኣጋጢምዎ

በዓል ደርቢ ህንጻ ሽግ ማለት "ቶርች ታወር" ዝተባህለ ሓደ ካብ ዓለምና ዝነውሐ መንበሪ ህንጻ ዱባይ ትማሊ ባርዕ ሓዊ ኣጋጢሙዎ።

እቲ ካብ መበል 65 ደርቢ ዝተበገሰ ባርዕ: ኣብ ሰዓታት ድሕሪ ፍርቂ ለይቲ ዘጋጠመ ክኸውን እንከሎ: ኣብ ውሽጢ ክልተ ሰዓት ግን ኣብ ልዕሊ ዝኾነ ሰብ ሓደጋ ከየውረደ ኣብ ቁጽጽር ከምዝኣተወ ሰበ ስልጣን መጥፋእቲ ሓዊ ዱባይ ገሊጾም።

ብመሰረት ሓበሬታ መጥፋእቲ ሓዊ ዱባይ፡ ኣባላት መጥፋእቲ ሓዊ ፡ እቲ ባርዕ ድሕሪ ምጅማሩ ኣርባዕተ ደቒቕ ኣብቲ ቦታ ተረኺቦም ነበርቲ ኣብ ምውጻእን ባርዕ ኣብ ምጥፋእን ከምዝተሳተፉ ብተወሳኺ ገሊጾም።

ሓላፊ ፖሊስ ዱባይ መጀር ጀነራል ዓብዱላህ ከሊፋ ኣል ማሪ: "ብዘይኾነ ኣብ ልዕሊ ሰብ ዝወረድ ጉድኣት ነቲ ባርዕ ክንቆጻጸሮ ምኽኣልና ንኣምላኽ ነመስግን" ኢሉ። ንሱ ብተወሳኺ ብናይ ኩላትና ምትሕብባር: ነበርቲ ናብ ካልእ ህንጻ ተሰጋጊሮም ክብል ጋዜጣዊ መግለጺ ሂቡ።

እዚ "ዘ ቶርች" ተባሂሉ ዝጽዋዕ ህንጻ ኣብ ዝሓለፈ ክልተ ዓመት ንካልኣይ ግዜኡዩ ሓደጋ ባርዕ ዘጋጥሞ ዘሎ።