ም/ፕረዚደንት ሰልፊ ብልጽግና መቐለ ተጓዒዙ ምስ ፈጻሚ ስራሕ ህወሓት ተራኺቡ

ብምኽትል ፕረዚደንት ሰልፊ ብልጽግና ኣቶ ኣደም ፋራሕ ዝምራሕ ጉጅለ ሎሚ ሰሉስ ንመቐለ ተጓዒዙ ምስ ፈጻሚ ስራሕ ህወሓት ምርኻቡ ክልላዊ ምንጭታት ትግራይ ጸብጺበን። እቲ ዘተ ኣብ ስምምዕ ተጻብኦታት ፕሪቶሪያ ኣመልኪቱ ከም ዝተኻየደ ዝገለጸ እቲ ዜና፡ ዝርዝር ናይቲ ዝተበጽሐ ዝርርብ ግን ኣየስፈረን። እንተዀነ ክልተኦም ወገናት ነቲ ደንጉዩ ጀሚሩ ዝበሎዎ ስሩዕ ርክብ ኣብ ሓጺር እዋን ክጅምሩዎ ምስምማዖም ጠቒሶም ኣለዉ።

ኣብ ካልእ ምዕባለ፡ ነቲ ጉጅለ መሪሑ ተጓዒዙ ዘሎ ምኽትል ፕረዚደንት ሰልፊ ብልጽግና፡ ካብ ትማሊ ሰኑይ ጀሚሩ ኣብ መንግስታዊ መሓዉር ካልእ ሸመት ከም ዝተዋህቦ ቤት ጽሕፈት ቀዳማይ ሚኒስተር ኢትዮጵያ ኣብ ዘውጽኦ ሓጺር ናይ ጽሑፍ መግለጺ ሓቢሩ። እቲ ኣቐዲሙ ኣፈ-ጉባኤ ፈደረሽን ዝነበረ ኣደም ፋራሕ ብምኽትል ቀዳማይ ሚኒስተር ደረጃ፡ ኣብቲ ቤት ጽሕፈት ሓላፊ ማእከል ደሞክራሲያዊ ህንጸትን ቤት ጽሕፈት ምውህሃድን (Democracy Building Center Coordinator Office) ዝብል መዓርግ ካብ ትማሊ ጀሚሩ ከም ዝተሾመ እቲ ናይ ጽሑፍ መግለጺ ኣፍሊጡ።