ኣመሪካን ደንማርክን ወታሃደራዊ ስምምዕ ተፈራሪመን

ዴንማርክን ኣመሪካን፣ ሰራዊት ኣመሪካን ኣጽዋሩን ኣብ ግዝኣት ዴንማርክ ንክሰፍር ከምዝተሰማማዓ ቀ/ሚ ዴንማርክ ሜት ፍሬድሪክሰን ኣፍሊጦም።

እዚ ንዝቅጽላ ዓሰርተ ዓመታት ዝጸንሕ ስምምዕ ከምዝተበጽሐ ዝተገልጸ፣ ኣመሪካ ተመሳሳሊ ውዕላት ምስ ፊንላንድን ስዊድንን ድሕሪ ምፍራማ እዩ።

ፊንላንድ ሰኑይ ዝኸተመትሉ ወትሃደራዊ ውዕል፣ ሰራዊት ኣመሪካ ኣብ’ቲ ምስ ሩስያ ዘዳውብ ነዊሕ መስመራት ፊንላንድ ንክሰፍር ዘኽእሎ ከምዝኾነ’ውን እቲ ዜና ይጠቅስ። ስዊድን ኣብ ታሕሳስ ተመሳሳሊ ውዕል ክትፍርም ከላ፣ ምስ ሩስያ ሓጺር መስመር ትራኸብ ኖርዌይ ከይተረፈት፣ ሰራዊት ኣመሪካ ኣብ ግዝኣታ ክሰፍር ከሎ ዝገዝኦ ኣሰራርሓታት ዝሓቆፈ ሰነድ ተፈራሪማ እያ።