ሚ/ጉ/ወጻኢ ኣመሪካ ምስ ቀ/ሚ ኢትዮጵያ ኣብ እዋናዊ ጉዳያት ተዘራሪቦም

ሚንስተር ጉዳያት ወጻኢ ኣመሪካ ኣንተኒ ብሊንከን ምስ ቀዳማይ ሚንስተር ኢትዮጵያ ኣብይ ኣሕመድ ብዛዕባ ብድሆታት ጸጥታ ቀርኒ ኣፍሪቃን ኩነታት ኢትዮጵያን ተዘራሪቡ።

ወሃቢ ቃል ሚንስትሪ ጉዳያት ወጻኢ ኣመሪካ ማት ሚለር ከም ዝሓበሮ ፡ ቀዳማይ ሚንስተር ኣቢይን ብሊንከንን ኣብቲ ብተሌፎን ዝገበርዎ ርክብ ብዛዕባ ሓድነታዊት ሰላማዊትን ብልጽግትን ኢትዮጵያ`ውን ሓሳብ ተለዋዊጦም።

ብሊንከን ኣብቲ ርክብ ኣብ ክልላት ኣምሓራን ኦሮሚያን ዘሎ ኩነታት ሻቕሎቱ ድሕሪ ምግላጽ ብፖለቲካዊ ልዝብ ሰላማዊ ፍታሕ ምፍታሽ ኣድላዪ ምዃኑ`ውን ኣስሚርሉ`ሎ። ምኽባር ሰብኣዊ መሰላት ዝጠቐሰ ብሊንከን፡ ሰብኣዊ ሓገዝ ንምቕጻል ብዛዕባ ክግበር ዝግብኦ ምምሕያሽ ቁጽጽር ረድኤት`ውን ጠቒሱ`ሎ።

እቲ ሚንስተር ጉዳያት ወጻኢ ኣመሪካ ኣብቲ ምስ ቀዳማይ ሚንስተር ኣቢይ ዝገበሮ ርክብ፡ ኢትዮጵያ ሓደ ግሉጽ ተኣማኒን ሓቛፊን መስርሕ ፍትሒ ንምቛም ትገብሮ ንዘላ ዝበሎ ጻዕሪ`ውን ምንዓዱ ሓበሬታ ሚንስትሪ ጉዳያት ወጻኢ ኣመሪካ የመልክት።