ኣባል መሪሕነት ኦፌኮ ኣቶ በቀለ ገርባ ኣብ ኣመሪካ ዑቕባ ሓቲቶም

ንህይወቶምን ህይወት ስድራኦምን ስግኣት ኣለኒ ዝበሉ ኢትዮጵያዊ ኣባል ተቃዋሚ ፓርቲ ኣቶ በቀለ ገርባ፣ ኣብ ኣመሪካ ዑቕባ ከምዝሓተቱ ትማሊ ሶኑይ ንኣገልግሎት ዜና ኣጃንስ ፍራንስ ፈረንሳ ሓቢሮም።

ኣቶ በቀለ ገርባ፣ ኣብ ኢትዮጵያ ዘሎ ኩነታት የንቆልቁል ከምዘሎ፣ ምፍርራሕ፣ ጅምላዊ ማእሰርቲ ኣብ’ታ ሃገር ንቡር ይኸውን ምህላውን፥ ኣብ ኢትዮጵያ ብሰላማዊ ኣገባብ ምቅላስ ዝካኣል ኣይኮነን ብምባል ኣቶ በቀለ ኣብ ፈደራሊስት ኮንግረስ ኦሮሞ ዝነበሮም ሓለፍነት ከምዘረከቡ ተሓቢሩ'ሎ።

ኣብ ኣመሪካ ኮይኖም ብቴለፎን ምስ ኣጃንስ ፍራንስ ፈረንሳ ዝተራኸቡ ኣቶ በቀለ"ናብ ኢትዮጵያ ንዘይምምላስ ወሲነ እየ፣ ፖለቲካዊ ዑቕባ ኣብ ኣመሪካ ሓቲተ ኣለኹ’ ይብሉ።

ምስዚ ብዝተሓሓዝ ዝሓለፈ ዓመት ካብ ማእሰርቲ ዝተፈትሐ ኣቶ ጀውሃር መሓመድ፣ ካብ’ታ ሃገር ከምዝተሰደደ’ውን እቲ ዜና ገሊጹ ኣሎ።