ኣብ ከተማ ባህርዳር ብዝተፈጸመ መጥቃዕቲ ነታጕ 23 ሰባት ቆሲሎም

ባህርዳር — 

ካብ ከተማ ባህርዳር ናብ ሃዋሳ ንምጉዓዝ ኣውቶቡስ ይስቀሉ ኣብ ልዕሊ ዝነበሩ ደገፍቲ ክለብ ኩዕሶ እግሪ ባህርዳር ብዝተሰንደወ ነታጕ 23 ሰባት ከምዘቑሰለ ከንቲባ እታ ከተማን ፕረዚደንት'ቲ ክለብ ዶ/ር ድረስ ሳህሉ ገሊጾም።

ኣብ ልዕሊ ደገፍቲ ክለብ ኩዕሶ እግሪ ባህርዳር ትማሊ ረቡዕ ዝተፈጸመ መጥቃዕቲ ኣብ ሰዓታት ወጋሕቲ 10፡45 (ብኣቆጻጸራ ኢትዮጵያ) ከምዘጋጠመ ፕረዚደንት'ቲ ክለብ ዶ/ር ድረስ ሳህሉ ሓቢሮም።

ንሶም ወሲኾም ከምዚ ዝበሉ መጥቃዕቲታት ኣብታ ከተማ ክፍፀሙ እዚ ፈላማይ ከምዘይኮነ ብምግላጽ “ኣብታ ከተማ ጸገም ጸጥታ ብምፍጣር ኢድ መንግስቲ ክጠውዩ ዝደልዩ” ክብሉ ንዝገለፅዎም ሽሞም ዘይተጠቐሱ ኣካላት ተሓተቲ ገይሮም ኣለው።

ይኹን ደኣ እምበር ሓላፍነት'ቲ መጥቃዕቲ ክሳብ ሕጂ ዝወሰደ አካል የለን።

ጸወታ ክለብ ባህርዳር በቲ ተመዲቡ ዝነበረ መሰረት ፅባሕ ዓርቢ ኣማስዩ ኣብ ስታድዮም ዩኒቨርስቲ ሃዋሳ ክካየድ ምዃኑ ማሕበር ኣክስዮን እቲ ፕሪሜርሊግ ንድምፂ ኣመሪካ ሓቢሩ'ሎ።