መገዲ ኣየር ኣዘርባጃን ናብ ሩስያ ዘካይዶ ዝነበረ በረራታት ደው ምባሉ ኣፍሊጡ

ነፋሪት ኣዘርባጃን ኣብ ገጠራት ሩስያ ድሕሪ ምውዳቓ ኪኢላታት ስርዓተ ጸረ ነፈርቲ ሩስያ ዝፈጠሮ ሓዊ ጠንቂ'ቲ ሓደጋ ምዃኑ ድሕሪ ምግላጾምን መንገዲ ኣየር ኣዘርበጃን ናብ ሩስያ ዘካይዶ በረራታት ደው ከምዘበሎ ኣፍሊጡ'ሎ።

ነፋሪት መገዲ ኣየር ኣዘርባጃን ካብ ርእሰ ከተማ ባኩ ናብ ናይ ሩስያ ከተማ ግሮዝንይ በረራ ኣብ ተኻይደሉ ከምዝወደቐትን ኣብ ካዛኪስታን ንክትዓልብ ኣብ ዝፈተነትሉ እዋን ከምዝተሓምሸሸት’ውን እቲ ዜና ይጠቅስ።

38 ተሳፈርቲ ሽዑ ሽዑ ክሞቱ ከለው ካልኦት 29 ሰባት ግና ምድሓኖም ተፈሊጡ'ሎ።

ሰበ-ስልጣን ኣዘርባጃን፣ ካዛኪስታንን ሩስያን ብዛዕባ ጠንቂ’ቲ ሓደጋ ክሳብ ዝጻረ ንጸበ ኢሎም ርእይቶ ካብ ምሃብ ተቖጢቦም ኣለው። ኣባል ቤት ምኽሪ ኣዘርባጃን ግና ንሩስያ ይኸስስ።