ዓፋር ክልል ኢትዮጵያ እሳተ-ጎመራ ዘንቀሎ ጎስዒ ምትኳሱ ተገሊጹ

ኣዋሽ ፈንታለ ኣብ ዝተባህለ ከባቢ ክልል ዓፋር፡ ኢትዮጵያ፡ እሳተ-ጎመራ ዘንቀሎ ጎስዒ፡ ጋዝ ንላዕሊ ክትኮስ ሎሚ ዓርቢ ምርኣዩ ሮይተርስ ሓቢሩ።

በቲ ሓደጋ ዝሰግኡ ነበርቲ ናብ ግዝያዊ መዕቆቢ ከም ዝተወስዱ መሓዉራት ዜና መንግስቲ ሓቢረን።

ሰብ-መዚ እቲ ከባቢ፡ ኣብ ሰብ ክወርድ ንዝኽእል ሓደጋ ንምውጋድ፡ ነበርቲ ካብቲ ቦታ ክርሕቁ መምርሒ ሂቦም ኣለዉ። ትካል ሓደጋ ህጹጽ እዋን ኢትዮጵያ ከም ዝብሎ፡ ዛጊት እኳ ዝርአ ስግኣት እንተ ዘየሎ፡ ካብቲ ከጋጥም ዝኽእል ሓደጋ ንምክልኻል ግን ጥንቃቐ ይወስዱ ከም ዘለዉ ሓቢሮም።

ኣዋሽ ፈንታለ፡ ቀረባ እዋን ተደጋጋሚ ምንቅጥቃጥ ምድሪን ተርእዮታት እሳተ-ጎመራን ዝተራእየሉ’ዩ። ኣብቲ ክልል ኣብ ቀረባ እዋን ዝተራእየ ሰንሰለታዊ ምንቅጥቃጥ ምድሪ ድማ ንስሩዕ መነባብሮ እቲ ከባቢ ከም ዝጸለዎ ይዝከር።