ወሃቢት-ቃል ሕብረት ኣፍሪቃ ኢባ ካሎንዶ፡ እቲ ሕብረት፡ ኣጻራይ ጉጅለ ናብ`ቲ ዘሰሓሕብ ዝብሃል ዘሎ ቦታ ከምዝልእኽን፡ ኤርትራን ጅቡትን ምሕዝነተን ናብ ንቡር ክመልሳ ከምዝሕግዝን ኣፍሊጣ`ላ።
“ኣብ`ዚ ክነስመረሉ ንደሊ፡ ኮሚሽን ሕብረት ኣፍሪቃ ምስ ሰበ-ስልጣን ጅቡትን ኤርትራን ብቐረባ ይመክር ከምዘሎን ኣብ መስርሕ ድማ ኣጸራይ ጉጅለ ናብቲ ዶብ ኸምዝልእኽን፡ ክልቲአን ሃገራት ምሕዝነተን ናብ ንቡር ንምምላስ ሕብረት ኣፍሪቃ ከምዝሕግዝን`ዩ።”
እቲ ምልኣኽ ኣጸራይ ጉጅለ ምስ ሰበ-ስልጣን ኤርትራን ጅቡትን ብምምኽኻርን ብምስምማዕን ከምዝግበር ዝገለጸት ወሃቢት ቃል፡ እዚ ድማ ኣካል ናይቲ ብመንጽር ሕብረት ኣፍሪቃ ዝኽተሎ ንኽልቲአን ሃገራት ናብ ንቡር ምሕዝነት ክምለሳ ዝገብሮ ጻዕሪ`ዩ ኢላ። “ኮሚሽን ሕብረት ኣፍሪቃ እተን ኣባል ሃገራት ዝኾና ጅቡትን ኤርትራን ምሕዝነተን ናብ ንቡር ክመልሳን ጽቡቕ ጉርብትና ኸማዕብላን ንምርግጋጽ ይሰርሕ ኣሎ። እዚ ድማ ሓደ ካብ`ቲ ናቱ ኣሰራርሓ`ዩ።”
ካብ ወገን ኤርትራ፡ ቅድሚ ትማሊ መግለጺ ዘውጽአ ሚንስትሪ ዜና ኤርትራ፡ ብዛዕባ ምውጻእ ቐጠር ክሳብ ሎሚ ዝተነገረና ሓበሬታ የለን ይብል። እቲ ብቐጠር ዝተወስደ ናይ `ታህዋኽ` ዝበሎ ስጉምቲ ድማ፡ ብምኽንያት`ቲ ዝርአ ዘሎ ሓጎጽጎጻዊ ሃዋህው እዩ ኢሉ መንግስቲ ኤርትራ ከምዝኣምን ዝገለጸ እቲ መግለጺ፡ ኣብ`ዚ ሰዓት`ዚ ኣብ ግምታዊ ትንተና ክንጽመድ ግቡእ ኮይኑ ኣይርኣየናን ኢሉ`ሎ።
ብዛዕባ`ቲ ኩነታት ምሉእ ሓበሬታ ምስረኸበ ርእይትኡ ዕላዊ ከምዝገብር`ውን ሚኒስትሪ ዜና ኣብ መግለጺኡ ኣፍሊጡ`ሎ። ኣብ ሕብረት ኣፍሪቃ ንኣምባሳደር ኤርትራ ደስታ ዝጠቐሰ ኣሶስይትድ ፕረስ ድማ፡ ሃገሩ ምስ ቐጠር ዲፕሎማሲያዊ ርክብ ኣየቋረጸትን ምባሉ ጠቒሱ`ሎ።
ጎረቤት ጅቡትን ኤርትራን ዝኾነት ኢትዮጵያ ብወገና፡ ነቲ ኣብ ዶብ ጅቡትን ኤርትራን ዘሎ ምዕባለታት ብቐረባ ትከታተሎ ከምዘላን፡ ነቲ ብኣቦ መንበር ኮሚሽን ሕብረት ኣፍሪቃ ዝወጸ ናብ`ቲ ኸባቢ ኣጻራይ ኮሚሽን ምልኣኽ ዝብል መግለጺ ከምትደግፍን ኣፍሊጣ`ላ። ከምኡ`ውን ክልቲአን ሃገራት ካብ ውጥረት ሃዲአን ፍልልያተን ብሰላም ክፈትሓ ብምጽዋዕ፡ ሕቡራት ሃገራት ነቲ ጻዕሪ ክድግፍ ነተባብዕ ይብል ካብ ወሃቢ-ቃል-ሚንስትሪ ወጻኢ ኢትዮጵያ ዘወጸ መግለጺ።
ቐጠር ሰራዊታ ካብ`ቲ ትሽምግሎ ዝነበረት ዶብ ኤርትራን ጅቡትን ዘውጸአት፡ ኣብቲ ምስ ስዑድን፡ ገለ ሃገራት ወሽመጥን ዘጋጠማ ምስሕሓብ፡ ኤርትራን ጅቡትን ምስ ጉጅለ ስዑድያ ድሕሪ ምውጋነን`ዩ።
