ኣብ መንጎ ሰራዊት ምክልኻል ኢትዮጵያን ዕጡቓት ፋኖን ምልውዋጥ ተኵሲ ምቕጻሉ ነበርቲ ይገልጹ

ኣብ መንጎ ሰራዊት ምክልኻል ኢትዮጵያን ዕጡቓት ፋኖን ይካየድ ዘሎ ውግእ ቀፂሉ ምውዓሉ ነበርቲ ከባቢታት ደብረ ማርቆስን ሸዋ ሮቢትን ኣፍሊጦም።

ካብ ትማሊ ጀሚሩ ኣብ ደብረ ማርቆስ፣ ደምበጫ፣ ፍኖተ ሰላም፣ አማኑኤልን ከባቢኡን ከምኡ እውን ኣብ ዞባ ሰሜን ሸዋ ከተማ ሸዋ ሮቢት ብከቢድ ኣፅዋር ዝተሰነየ ቶኽሲ ከምዝቐፀለን ኣብ ልዕሊ ህይወት ሰባት ጉድኣት ምውራዱን እቶም ንደሕንነቶም ክብሉ ሽሞም ክግለፀሎም ዘይደለዩ ወሃብቲ ርእይቶ ተዛሪቦም።

መንግስታዊ ኣመራርሓ ከተማ ደብረ ማርቆስ ኣብቲ ቦታ ብዘይምህላው ርእይቶም ምርካብ ኣይተኽኣለን።

ዝቐፀለ ውግእ ኣብ ኣገልግሎት ስፔሻላይዝድ ሪፈራል ሆስፒታል ደብረ ማርቆስ ተፅዕኖ ከምዝፈጠረ'ውን እቲ ሆስፒታል ኣፍሊጡ ኣሎ።

ብዛዕባ እዚ ካብ ክልል ኣምሓራን ፌደራልን ጉዳያት ኮምኒኬሽን ምላሽ ንምርካብ ዝተኻየደ ፃዕሪ ኣይሰለጠን።

መንግስቲ "ሕግን ስርዓትን ንምኽባር’’ ዕጡቓት ፋኖ ድማ "ናይ ህልውና ቓልሲ’’ ኢሎም ብዝጸውዕዎ ውግእ ኣብ ሰብኣውን ናውትን ጉድኣት ምውራዱን ናይቲ ግጭት ዕሙቐትን ስፍሓትን ከም ዘተሓሳሰቦምን ሃገራውን ዓለምለኸን ትካላት ኣብ ዝተፈላለዩ እዋናት ምግላፆም ይዝከር ።