ቤት ምኽሪ ሰላም ክልል ኣምሓራ ዓለምለኸ ማሕበረሰብ ኣብ ልዝብ ሰላም'ቲ ክልል ተጽዕኖ ከሕድር ጸዊዑ

ኣመሪካን ማሕበረሰብ ዓለምን፣ ግጭት ክልል ኣምሓራ ብሰላማዊ ኣገባብ ንክፍታሕ፣ ኣብ ልዕሊ ተዋጋእቲ ሓይልታት ተጽዕኖ ከሕድሩ ናይ’ቲ ክልል ቤት ምኽሪ ሰላም ሓቲቱ።

ኣካቢ እቲ ቤት ምኽሪ ያየህይራድ በለጠ ንድምጺ ኣመሪካ ከምዝገለጽዎ መንግስቲን ፋኖን ናብ ልዝብ መታን ክምለሱ ምስ ዓለምለኸ ትካላት ተሓባቢርካ ይስራሕ ኣሎ ኢሎም።

እቲ ቤት ምኽሪ ምስ ኤምባሲ ኣመሪካ ኣብ ኣዲስ ኣበባ ከምዝተዘራረበን ተጽዕኖ ንክግበረሎም ምሕታቱን’ውን ሓቢሮም።

ሰራዊት መንግስቲን ዕጡቃት ፋኖን ብሰንኪ ዘካይድዎ ግጭት ዝፍጸሙ መግሃስቲ መሰላት፣ ዘተሓሳስብ ኮይኑ ይቅጽል ከምዘሎ ኢሰመኮ ቅድሚ ትማሊ ኣብ ዘውጽኦ ናይ ርብዒ ዓመት ሪፖርት ምግላጹ ይፍለጥ።