ኣብ ዞባ ደቡብ ወሎ ብመጥቃዕቲ ከቢድ ብረት 5-ሰባት ምሟቶም ነበርቲ ገሊጾም

ኣብ ክልል ኣምሓራ ዞባ ደቡብ ወሎ ወረዳ ደላንታ ከተማ ወገል ጤና ትማሊ ሓሙስ ምሸት ብዝተተኮሰ ከቢድ ብረት ሓሙሽተ ሰባት ከምዝተቐተሉ መሰኻኽር ዓይኒ ንድምፂ ኣመሪካ ገሊፆም።

ብተመሳሳሊ ኣብ ዞባ ሰሜን ወሎ ወረዳታት ላስታን ሃብሩን ብዝተተኮሰ ከቢድ ብረት ኣብ ልዕሊ ስቪላት ሞትን መቑሰልትን ከምዝወረደ ነበርቲ ገሊፆም።

ብኻልእ ወገን ኣብ ዞባ ሰሜን ወሎ ኣብ ዝሓለፈ 16 ሕዳር 2016 ኣብ ወረዳ ሃብሩ ቤተ ክርስትያን ጋቲራን ከባቢኡን ብዝወደቐ ከቢድ ብረት ሃይማኖታዊ ኣገልግሎት ይህቡ ዝነበሩን ኣመንትን መቑሰልቲ ከምዘጋጠሞም ናይቲ ገዳም ኣበ ምኔት ገሊፆም።

ሓላፊ ኮምኒኬሽን መንግስቲ ብዛዕባ እቲ መጥቓዕቲ ምግላፅ ከምዘይደሊ ብምሕባር እቲ ኮማንድ ፖስት ንቕድሚት መግለፂ ከምዝህብ ሓቢሩ።

ኮሚሽን ሰብኣዊ መሰላት ኢትዮጵያ ብመጥቓዕቲ ድሮንን ገዛ ንገዛ ኣብ ዝካየድ ፍተሻን ኣብ ክልል ኣምሓራ ይፍፀም ንዘሎ ቅትለት ብምኹናን ኣብ ዝሓለፈ ወርሒ መግለፂ ኣውፂኡ ምንባሩ ይፈለጥ።