ነበርቲ፡ ካብ ክልል ትግራይ ዝመጹ ዕጡቓት ኣብ ወረዳ ዓደርቃይ መጥቃዕቲ ፈንዮም ክብሉ ይሕብሩ

ኣብ ዞባ ሰሜን ጎንደር ወረዳ ዓደርቃይ ካብ ክልል ትግራይ ዝመጹ ዝተባህሉ ዕጡቓት ብዝፈጸምዎ መጥቃዕቲ ሰባት ከምዝሞቱን ከምዝቖሰሉን ድምጺ ኣመሪካ ዘዘራረቦም ነበርቲ ገሊጾም።

ካብ ወሃቢ-ቃል ህወሓት ምላሽ ኣይተረኽበን፡ እንተኾነ ምኽትል ኣመሓዳሪ ሰሜናዊ ምዕራብ ክልል ትግራይ ከላሊ ሓጋዚ ካብ ክልል ትግራይ ተበጊሱ መጥቃዕቲ ዝፈጸመ የለን ብምባል ክልሉ ሓላፍነት ከም ዘይወስድ ኣፍሊጡ`ሎ።

ናይቲ ከባቢ ሚልሻ ነቲ ዝተፈነዎም መጥቃዕቲ ንምክልኻል እንተፈተኑ`ኳ ዝወረደ ሰብኣዊን ንዋታውን ጉድኣት ግን ከቢድ`ዩ ክብሉ ርእይትኦም ዝሃቡ ነበርቲ ሓቢሮም። በቲ መጥቃዕቲ ብውሕዱ ሸሞንተ ሰባት ከምዝሞቱን ሰለስተ ከምዝቖሰሉን ተገሊጹ'ሎ።

ድሕሪ`ቲ መጥቃዕቲ ኣብ ዝተኻየደ ናይ ተኹሲ ምልውዋጥ ድጋፍ ንምሃብ ናብቲ ቦታ ተንቀሳቒሶም ምንባሮም ዝገለጸ ናይ ወረዳ ወልቃይት ግዚያዊ ኣመሓዳሪ ታምራት ደሳለኝ ቁጽሪ ግዳያት ልዑል ምዃኑ ተዛሪቡ።

ክልል ኣምሓራ ኮነ ምምሕዳር ዞባ ሰሜን ጎንደር ብዛዕባ`ቲ ብዕጡቓት ህወሓት ኣብ ወረዳ ዓደርቃይ ተፈጺሙ ዝተባህለ መጥቃዕቲ ዝሃብዎ ርእይቶ የለን።