ኣብ ኣዲስ ኣበባ ብዝተወደበ ገበን ዝተጠርጠሩ ኣሽሓት ሰባት ኣብ ቀይዲ ምእታዎም ፖሊስ ኣፍሊጡ

ፖሊስ ኣዲስ ኣበባን ፈደራል ፖሊስን ብዝገበርዎ ናይ ሓባር ስርሒት ብዝተወደበ ገበናት ዝጠርጠርዎም ብኣሽሓት ዝቑጸሩ ሰባት ከምዝኣሰሩ ኣፍሊጦም።

በቲ ስርሒት ድማ ኣጽዋራትን ኣደንዛዚ ዕጽን ከምኡ`ውን ዝተሰርቁ ተንቀሳቓሲ ተለፎናትን ካልእ ንብረትን ከም ዝሓዙ ካብ ኮሚሽነራት ፖሊስ ሓደ ዝኾነ ኣድማሱ ኢፋ ሎሚ ንሪፖርተራት ተዛሪቡ`ሎ። በቲ ናይ ሓባር ስርሒት ልዕሊ 5,500 ተጠርጠርቲ ከም ዝተታሕዙ`ውን ወሲኹ ጠቒሱ`ሎ።

ከይተሰርቁ ወይ ከይቆሰሉ ዝሓልፍሉ መዓልቲ ከም ዘየለ`ዮም ዝገልጹ ነበርቲ ኣዲስ ኣበባ፡ ስርቂ፡ ጭውያ፡ ማህረምቲ ከምኡ`ውን ካልኦት ገበናት መዓልታዊ ተርእዮ ምዃኖም ይገልጹ።

እቲ ማእሰርቲ ብምብዝሑ ዝተላዕለ ከም ግፋ ዝተራእየሉ ኩነታት ከም ዘሎ፡ እንተኾነ ግፋ ከም ዘይኮነ ፖሊስ ገሊጹ`ሎ።

በቲ ንዝሓለፈ 20 መዓልታት ዝተኻየደ ስርሒት፡ ምስ ገበነኛታት ብምትሕብባር ዝተጠርተሩ ልዕሊ 20 ዝኾኑ ኣባላት ጸጥታ `ውን ኣብ ትሕቲ ቁጽጽር ከም ዝኣተዉ ፖሊስ ኣዲስ ኣበባ ኣፍሊጡ`ሎ።