ሰራሕተኛ ኣመሪካዊ ንመኽሰብ ዘይቆመ ትካል ኣብ ክልል ኣምሓራ ተቐቲሉ

ኣብ ኣመሪካ ክፍለ- ግዝኣት ኦሪገን ዝመደበሩ ንመኽሰብ ዘይቆመ "ሜዲካል ቲም" ዝተባህለ ትካል ሰራሕተኛ ኣብ ኢትዮጵያ ክልል ኣምሓራ ምቕታሉ ሰበ-ስልጣን ኣፍሊጦም።

እቲ ሙስጠፋ ኣልካሲም ዝተባህለ መራሕ መኪና መዲካል-ቲም ብዓርቢ ኣብ ክልል ኣምሓራ ዝጉዓዘሉ ዝነበረ ብዝተኸፈተሎም ተኵሲ ምቕታሉ ወሃቢት ቃል እቲ ትካል ካረን ካረትስ ብኢሜል ምሕባራ ኣሶሴይትድ ፕረስ ይገልጽ። ካልኦት ኣባላት'ቲ ትካል እውን መቑሰልቲ ከምዘጋጠሞም ተሓቢሩ’ሎ።

እቲ ትካል ኣብ ማሕበራዊ መራኸቢ ፌስቡክ ዘውጽኦ መግለጺ እቲ መጥቃዕቲ ንኣባላት'ቲ ትካል ዒላማ ዝገበረ'ዩ ኢሉ ከምዘይኣምን ሓቢሩ’ሎ።

እቲ ትካል ኣብ ኢትዮጵያ ኣገልግሎት ምሃብ ዝጀመረ ኣብ ሚያዝያ 2021 ኮይኑ ኣብ ሓሙሽተ ክልላት'ታ ሃገር ኣገልግሎት ከምዝህብ ይፍለጥ።