ሓደጋ ነፈርቲ ዋሺንግተን ዲሲ -- ዝደሓኑ ተሳፋርቲ ዘለዉ ኣይመስሉን

ረቡዕ ምሸት ወታሃደራዊት ሀሊክፕተርን ንብረት መንገዲ ኣየር ኣመሪካን ዝዀና ነፈርቲ ኣብ ከባቢ ማዕርፎ ነፈርቲ ሬጋን ድሕሪ ምግጫወን፡ ድሕሪ’ቲ ሓደጋ ብህይወት ዝወጽአ ክህሉ ከም ዘይክእል ሓሙስ ንግሆ ኣብ ዝተዋህበ ጋዜጣዊ መግለጺ ተሓቢሩ። እታ ናይ መጓዓዝያ ነፋሪት 60 ተጓዓዝቲን ኣርባዕተ ኣባላት በረራን ዝሓዘት ክትከውን እንከላ፡ እታ ሀሊኮፕተር ድማ ሰለስተ ሰባት’ያ ሒዛ ነይራ።

ድሕሪ’ታ ሓደጋ እተን ነፈርቲ ኣብቲ ናብ በረድ ዝተልወጠ ፈለግ ፖታማክ ድሕሪ ምዕላበን፡ ክሳብ ሓሙስ ንግሆ ኣብ ዝተኻየደ መስርሕ ፈተሻ ህይወት ኣድሕን ሬሳታት 28 ሰባት ተረኺቡ ኣሎ። እቲ መስርሕ ይቕጽል እኳ እንተሎ፡ ብህወይት ክድሕኑ ዘሎ ተኽእሎ ግን ኣዝዩ ልሕሉሕ ምዃኑ ሰብ-መዚ ገሊጾም።

እዚ ሓደጋ ኣብ ዝሓለፈ 24 ዓመታት እቲ ዝኸፍአ ምዃኑ ኣሶሸትድ ፕረስ ሓቢሩ።

እታ ካብ ዊቺታ ካንሳስ ዝነቐለት ናይ ህዝቢ ነፋሪት ክትዓልብ ኣብ እትዳለወሉ ዝነበረት እዋን’ዩ ምስታ ወታሃደራዊት ሀሊኮፕተር ተጋጭያ’ያ ነቲ ሓደጋ ኣስዒቡ። ፍንጭልጫል ናይታ ነፋሪት ናብቲ ኣብ ጥቓ እቲ ማዕርፎ ነፈርቲ ዝርከብ ፈለግ ክበታተን ተርእዩ።

ዝርዝር ናይቶም ተሳፈርቲ ዛጊት ወግዓዊ ኣይኰነን። እንተዀነ መብዛሕትኦም ካብ ውድድር ስኬቲንግ (ምንሽሕታት በረድ) ዝምለሱ ዝነበሩ ምዃኖም ተመልኪቱ ኣሎ። ካብ መንጎኦም፡ ዕዉታት መጻምድቲ ዓለማዊ ውድድር ስኬቲንግ ዝዀኑን ሩስያውያን ሰብ-ሓዳር ኢቭጀኒያ ሺሽኮቫን ቫዲም ኑሞቭን ከም ዝርከቡዎም ተሓቢሩ። ካልኦት ካብቲ ሰንበት ዝተዛዘመ ውድድር ስኬቲንግ ናይ ዊንሺታ ዝምለሱ ዝነበሩ ኣሰልጠንቲን ግዱሳት እቲ ውድድርን ከም ዝርከቡዎም ድሮ ተፈሊጡ ኣሎ።

ፕረዚደንት ዶናልድ ትራምፕ ብዛዕባ’ቲ ሓደጋ ዝተሰምዖ ሓዘን ገሊጹ ኣሎ።