ነበርቲ ኪንሻሳ ንህንጻ ኤምባሲታት የጥቅዑ

ኣብ ጎማ፡ ሰሜን ኪቩ ብዝካየድ ዘሎ ኲናት ዝተቖጥዑ ነበርቲ ኪንሻሳ ደሞክራሲያዊት ርፓብሊክ ኮንጎ፡ ሎሚ ሰሉስ ንኤምባሲታት ኣመሪካ፡ ፈረንሳይ፡ ሩዋንዳን ኬንያን ከም ዘጥቅዑ ሮይተርስ ኣስፊሩ። እቶም ነበርቲ ሃገራት ናይቶም ዘጥቅዑወን ኤምባሲስታት ነቲ ጎንጺ ንምዕራፍ እኹል ኣይሰርሑን ወይ ድማ ኣብቲ ጎንጺ ኢድ ኣለዎምን ብዝብል ቍጠዐ’ዩ።

ፖሊስ ነቲ ሰልፊ ብዘንብዕ ጋዝ ጌሩ በቲኑዎ ኣሎ። እንተዀነ፡ ምንጫታት ከም ዝገልጹዎ፡ እቶም ነበርቲ፡ ናብ ውሽጢ ቀጽሪ እተን ኤምባሲታት ክኣትዉ ኣይከኣሉን።

እቶም ጎረቤት ሃገር ሩዋንዳ ከም ዝሕገዙ ዝንገሩ ደባይ ተዋጋእቲ ኤም-23 ነታ ወሳኒት ከተማ ጎማ ድሕሪ ምቍጽጻሮም፡ እቲ ጎንጺ ንብዙሕ ሰብኣዊ ቅልውልዋ ኣሳጢሑ ምህላዉ ሕቡራት ሃገራት የመልክት። ከተማ ጎማ ኣስታት ክልተ ሚልዮን ህዝቢ ዝነብራ ከተማ'ያ።