ምብራቓዊ ወገን ኣመሪካ ውርጪ፡ ካሊፎርኒያ ባርዕ-ጫካ

ምብራቓዊ፡ ደቡብን ማእከላይን ኣመሪካ ብውርጪ ተሸፊኑሉ ኣብ ዘሎ እዋን፡ ኣብ ሎስ-ኣንጀለስ ካሊፎርኒያ ብዝተራእየ ባርዕ ጫካ ሓያሎ ኣባይቲ ሃሚዅ፡ ንነበርቲ ኣብ ራዕዲ ምጉያይን ሸሚሙ ምህላዉ ኣገልግሎት ዜና ኣሶሸትድ ፕረስ ኣመልኪቱ። ኣብ ወሰናስን ሎስ-ኣንጀለስ ብሰሉስ ጀሚሩ ናብ ረቡዕ ንግሆ ኣብ ዝቐጸለ ባርዕ፡ ዓሰርተታት ኣሽሓት ነበርቲ ብመኪናን ካልእ መጓዓዝያን ክሃድሙ ስለ ዘይከኣሉ ብእግሪ ተጸጓጊዶም ነብሶም ከውጽኡ ምርኣዮም እቲ ዜና ይሕብር።

እቲ ባርዕ ኣብ ሰለስተ ቦታታት ዘጋጠመ ኰይኑ፡ ንኣስታት 30-ሽሕ ነበርቲ እቲ ከባቢ ግን ክግዕዙ ደሪኹ ኣሎ። ብመሰረት ሓበሬታ መጥፋእቲ ሓዊ ሎስ ኣንጀለስ በቲ ባርዕ ክልተ ሰባት ክሞቱ እንከለዉ፡ ልዕሊ 28-ሽሕ ኣባይቲን ካልእ ህንጻታትን ምዕናዉ ተፈሊጡ።

ኣስታት 70-ሽሕ ነበርቲ ካብ መንበሪታቶም ክግዕዙ ክግበር እንከሎ፡ ብሰሉስት ኣስታት 167-ሽሕ ነበርቲ እቲ ከባቢ ብዘይ ሓይሊ መብራህቲ ነይሮም።